На наваполацкім ААТ «Нафтан» палічылі подпісы пад адкрытым зваротам да народа Беларусі. Раней тут заяўлялі, што завод будзе страйкаваць з 29 жніўня, калі да таго часу Аляксандар Лукашэнка ня пойдзе ў адстаўку, піша Tut.by.
Яшчэ 17 жніўня шэсьць «глябальных патрабаваньняў» да беларускіх уладаў агучыли на агульным сходзе:
- адстаўка Аляксандра Лукашэнкі з пасады прэзыдэнта Беларусі ў сувязі са стратай даверу
- адстаўка ЦВК на чале зь Лідзіяй Ярмошынай
- вызваленьне ўсіх палітвязьняў і затрыманых падчас мірных акцыяў
- спыненьне гвалту і перасьледу грамадзян з боку сілавых структураў
- расьсьледаваньне выпадкаў гвалту з прыцягненьнем да адказнасьці вінаватых
- новыя празрыстыя і сумленныя выбары з удзелам міжнародных назіральнікаў.
Подпісы зьбіралі 18–20 жніўня. Усяго ў галасаваньні ўдзельнічалі 3500 чалавек (агульная колькасьць работнікаў ААТ з «Нафтанам» і «Палімірам» — блізу 10 тысяч). Зь іх за адстаўку Лукашэнкі выказаліся 3238, за адстаўку ЦВК зь Ярмошынай — 3403, за вызваленьне палітвязьняў і затрыманых — 3415. Практычна ўсе згодныя і з астатнімі трыма пунктамі патрабаваньняў.
Аднак пра страйк актывісты ўжо не заяўляюць і просяць «гарачыя галовы» астыць. Прадстаўнікі заводу запэўніваюць, што ў выніку перамоваў з рабочымі бакі прыйшлі да паразуменьня — не рабіць «пасьпешлівых крокаў».
