Лінкі ўнівэрсальнага доступу

Менск, 16 жніўня, Марш Свабоды.
Менск, 16 жніўня, Марш Свабоды.

Пасьля мітынгу «за Лукашэнку» сотні тысяч менчукоў выйшлі на пратэст супраць яго. Што адбываецца ў Беларусі

абноўлена

У нядзелю а 12-й на плошчы Незалежнасьці ў Менску прайшоў мітынг у падтрымку дзяржаўнага курсу з удзелам Лукашэнкі. Ён сабраў каля 10 тысяч чалавек, зьвезеных з усёй Беларусі. «Марш Свабоды» ў Менску на праспэкце Пераможцаў сабраў больш за 100 тысяч чалавек.

07:37 17.8.2020

Колькі беларусаў сабраліся на акцыі супраць гвалту і фальсыфікацыі выбараў на плошчы Незалежнасьці. Відэа з дрона

22:55 16.8.2020

Мёры выйшлі на «Марш Свабоды»

«Марш Свабоды» адбыўся і ў Мёрах, маленькім райцэнтры на захадзе Віцебскай вобласьці. Удзельнічала каля 200 чалавек.

Дэманстранты зь бел-чырвона-белымі сьцягамі сабраліся на плошчы Леніна паабапал дарогі, потым пастаялі на набярэжнай возера, праз плошчу Перамогі выйшлі на цэнтральную вуліцу Камуністычную, дайшлі да краю мястэчка й вярнуліся ў цэнтар.

22:37 16.8.2020

Пратэсты ў Ляхавічах і Кіраўску

22:35 16.8.2020

Міліцыя не пацьвердзіла новыя затрыманьні

МУС Беларусі не пацьвярджае фактаў затрыманьня грамадзян 16 жніўня падчас правядзеньня акцыяў нязгодных з афіцыйнымі вынікамі галасаваньня на прэзыдэнцкіх выбарах, паведаміла карэспандэнту ТАСС прэс-сакратар МУС Беларусі Вольга Чамаданава.

«У апэратыўна-дзяжурнай службе інфармацыі пра затрыманьні ў нядзелю няма», — сказала яна.

Раней сёньня карэспандэнт Свабоды паведаміў, што ў цэнтры Менску ля ГУМу невядомыя схапілі некалькі чалавек, зацягнулі ў мікрааўтобус і павезьлі ў невядомым кірунку.

22:28 16.8.2020

Бабруйск — шэсьце за перамены

У нядзелю 16 жніўня агульнанацыянальны «Марш Свабоды» пачаўся ў Бабруйску а 13-й, сабраў значна больш за тысячу чалавек і працягваўся ўвесь дзень.

На цэнтральнай плошчы Леніна а 14-й сабралася каля тысячы чалавек. Гэтым разам, апроч безьлічы сьцяжкоў, балёнікаў і самаробных транспарантаў, бабруйчане падрыхтавалі два вялізныя бел-чырвона-белыя палотнішчы, якіх хапіла на ўсю шырыню трыбун ля помніка Леніну.

Зноў зладзілі вольны мікрафон і збор подпісаў — цяпер да пракурора Бабруйску — з патрабаваньнем пакараць фальсыфікатараў выбараў і сілавікоў, якія жорстка разганялі мірных маніфэстантаў, і да старшыні гарвыканкаму — з пытаньнямі да арганізацыі выбараў і празьмерных мер УУС па «зачыстцы» гораду 9–11 жніўня, а таксама з заклікам да яго як найхутчэй распачаць працэдуру пазбаўленьня Ярмошынай званьня ганаровага грамадзяніна Бабруйску.

У 15.30 вялізная сьвяточная калёна пайшла гуляць па цэнтральных вуліцах у суправаджэньні безупынных сыгналаў машын і вітаньняў з вокнаў дамоў. Дэманстранты пераходзілі дарогі выключна па пераходах і на зялёнае сьвятло. А 17-й яны вярнуліся на плошчу, сьвята працягнулася.

22:17 16.8.2020

Пратэст каля БТ вынікаў ня даў. У вечаровых навінах ізноў кансьпіралёгія, — аглядальнік Свабоды Дзьмітры Гурневіч

Кіраўніцтва БТ абяцала ўчора сваім супрацоўнікам, нязгодным з замоўчваньнем насільля сілавікоў і ігнараваньнем масавых мірных акцый, што канал пакажа праўду.

Пратэст каля Белтэлерадыёкампаніі 15 жніўня
Пратэст каля Белтэлерадыёкампаніі 15 жніўня

У «Галоўным эфіры» самаму вялікаму мітынгу ў гісторыі Беларусі, які адбыўся каля стэлы «Менск — горад-герой», прысьвяцілі некалькі сэкундаў. Не ўзгадалі ані пра колькасьць удзельнікаў, ані паказалі панарамных кадраў, ані далі слова ўдзельнікам. Не паказалі таксама ахвяраў катаваньняў.

Але паказалі выступ аднаго з кіраўнікоў АМАПу на мітынгу Лукашэнкі, якога сустрэлі авацыямі. Далей усё як звычайна. Гледачы пачулі, што Беларусь хочуць разгайдаць як бастыён эўразійскай інтэграцыі. Што літоўцы, палякі і латышы — ворагі. Што Ўкраіна ў агні. Усе навокал зайздросьцяць Беларусі і хочуць яе разадраць. Але ўжо не Расея. Яна ўжо стала тым, хто можа абараніць. Далей было пра ўборачную.

21:10 16.8.2020

Акцыя пратэсту ў Нясьвіжы і Лагойску

21:08 16.8.2020

Больш за тысячу чалавек на акцыі падтрымкі ў Празе

21:03 16.8.2020

Сілавікі па-ранейшаму выкрадаюць людзей?

20:54 16.8.2020

Дырэктар Купалаўскага тэатру: «Мы хочам, каб пачаўся працэс зьменаў»

Дырэктар Купалаўскага тэатру, былы пасол Беларусі ў Польшчы і Францыі Павал Латушка ўзяў удзел у маршы Свабоды ў Менску. Падчас акцыі ў інтэрвію TUT.BY ён заявіў:

«Менск ня бачыў такога, краіна ня бачыла такой колькасьці людзей, якія сёньня выйшлі для таго, каб выказаць сваю грамадзянскую пазыцыю. Фактычна мы сёньня можам канстатаваць, што ў Беларусі ствараецца грамадзянская плятформа, і ў яе аснову павінны быць пакладзены наступныя прынцыпы: не — гвалту, так — праву, так — заканадаўству, так — выкананьню законаў у нашай краіне. Наступны прынцып — мы хочам пераменаў, трансфармацый, каб пачаўся працэс зьменаў».

20:34 16.8.2020

Украінская СМІ адмовілася называць Лукашэнку прэзыдэнтам

Адно з найбуйнейшых украінскіх выданьняў «Украінская праўда» разам з парталам «Эўрапейская праўда» дамовіліся, што ў сваіх публікацыях будуць называць Аляксандра Лукашэнку «асобай, якая выконвае абавязкі прэзыдэнта Беларусі».

«Пасьля інаўгурацыі статус Аляксандра Лукашэнкі, вядома ж, зьменіцца на «самаабвешчаны»», – напісаў галоўны рэдактар «Эўрапейскай праўды» Сяргей Сідарэнка. – У сьвеце дастаткова тых, хто дадае легітымнасьці дыктатару. Ня хочацца быць аднымі зь іх».

Ён заклікаў рэдактараў зь іншых СМІ далучыцца да зьмены фармулёўкі.

20:15 16.8.2020

Што адбываецца ў Менску пасьля найбольшага пратэсту ў гісторыі Беларусі. СТРЫМ Свабоды

20:12 16.8.2020

Праваабаронцы патрабуюць неадкладна распачаць справы супраць сілавікоў, якія злоўжылі паўнамоцтвамі

Праваабаронцы цэнтра «Вясна» зьвярнуліся ў Генэральную пракуратуру з заявай, у якой патрабуюць неадкладна распачаць крымінальную справу ў дачыненьні да сілавікоў, якія злоўжывалі сваімі паўнамоцтвамі пры разгоне мірных дэманстрантаў.

У заяве адзначаецца, што з 9 па 13 жніўня ў розных месцах Менска і іншых гарадоў Беларусі супрацоўнікі Міністэрства ўнутраных спраў і Міністэрства абароны ажыцьцяўлялі адвольныя затрыманьні грамадзян, за імі ішлі катаваньні і акты жорсткага, бесчалавечнага, зьневажальнага абыходжаньня.

Чытаць далей

20:07 16.8.2020

Дзясяткі тысяч прыхільнікаў перамен на плошчы Незалежнасьці. ФОТА

На помніку Леніну зьявіліся розныя плякаты, у тым ліку «Ціханоўская наш прэзыдэнт». Людзі скандуюць «Трыбунал!», «Сыходзь!», «Звольнены!», «Свабоду палітвязьням!».

Да журналістаў падыходзяць удзельнікі акцыі і заяўляюць, што прыйшлі на покліч сэрца, а не па разнарадцы.

Пасьля поўдня на плошчы Незалежнасьці прайшоў мітынг у падтрымку Аляксандра Лукашэнкі. Сам Лукашэнка таксама прыбыў на плошчу і ў сваім выступленьні паўтарыў, што ўладу аддаваць не зьбіраецца.

20:05 16.8.2020

На волю выйшлі «дыджэі пераменаў». ФОТА

Сёньня з ізалятару на Акрэсьціна выйшлі гукарэжысэры Ўладзіслаў Сакалоўскі і Кірыл Галанаў, якія ўключылі 6 жніўня ў Кіеўскім сквэры ў Менску песьню Цоя «Перамен». Яны правялі за кратамі 10 сутак.

Хлопцы сказалі, што адчуваюць сябе добра, але пакуль «ня ведаюць, у якую краіну сёньня выйшлі».

Суд Цэнтральнага раёну Менску 7 жніўня прызнаў Кірыла і Ўладзіслава вінаватымі ў «дробным хуліганстве» і «непадпарадкаваньні міліцыі». Абодва атрымалі па 10 сутак адміністрацыйнага арышту.

Супрацоўнікі Палаца дзяцей і моладзі Ўладзіслаў Сакалоўскі і Кірыл Галанаў увечары 6 жніўня ўключылі песьню «Перемен» Віктара Цоя на афіцыйным канцэрце каля кінатэатру «Кіеў», перабіўшы выступ баяніста Віталя Варанко.

19:31 16.8.2020

Поўнае відэа прамовы Лукашэнкі на афіцыйным мітынгу раніцай

19:23 16.8.2020

Акцыя салідарнасьці ў Смалявічах

19:19 16.8.2020

Сэрбія адмаўляе датычнасьць сваіх вайскоўцаў да здушэньня пратэстаў у Беларусі

Пасьля таго як у сацыяльных сетках зьявіліся фатаздымкі сэрбскіх вайскоўцаў у Беларусі і камэнтары пра іх магчымую ролю ў здушэньні пратэстаў у Беларусі, міністар абароны Сэрбіі выступіў з абвяржэньнем.

15 жніўня беларускі аналітык Франак Вячорка апублікаваў здымкі сэрбскіх вайскоўцаў, зробленыя, як меркавалася, у Менску і Берасьці. Паводле Ф.Вячоркі, гэта вымагала высьвятленьня іх магчымага ўдзелу ў здушэньні цяперашніх пратэстаў у Беларусі.

У сваім адказе міністар абароны Сэрбіі Аляксандар Вулін заявіў, што такія сьцьверджаньні — «працяг адмысловай вайны супраць Сэрбскай арміі і яе вярхоўнага галоўнакамандуючага» (сэрбскага прэзыдэнта Аляксандра Вучыча. — РС).

Паводле сайта міністэрства, Вулін патлумачыў, што некаторыя з фота, апублікаваных у сацыяльных сетках, былі зробленыя ў 2018 годзе падчас супольных вучэньняў войска і паліцыі ў сэрбскім горадзе Кралеве.

«Дзевяць нашых вайскоўцаў цяпер у Беларусі, у Берасьці, ізаляваныя на вайсковым палігоне, дзе яны рыхтуюцца да вайсковых спаборніцтваў «Снайпэрская мяжа».

Кіраўнікі Беларусі і Сэрбіі Аляксандар Лукашэнка і Аляксандар Вучыч апошні раз сустракаліся ў Менску ў чэрвені 2019 году. Вучыч тады падзякаваў Лукашэнку за тое, што Беларусь не прызнала Косава, а таксама перадала чатыры старыя самалёты MiG-29. Падрабязнасьці ўгоды, аднак, невядомыя, бо Міністэрства абароны Сэрбіі вызначыла гэтыя дамовы як «сакрэтныя».

19:17 16.8.2020

«26 гадоў кашмару павінны скончыцца!». Рэзалюцыя мітынгу ўдзельнікаў Маршу Свабоды

Удзельнікі шматтысячнага мітынгу каля стэлы «Менск — горад-герой» падтрымалі патрабаваньне каардынатаркі аб’яднанага штабу Марыі Калесьнікавай аб адстаўцы Аляксандра Лукашэнкі.

«Наша галоўнае патрабаваньне — былы прэзыдэнт мусіць падаць у адстаўку. 26 гадоў кашмару павінны скончыцца, гэта не павінна працягвацца», — заявіла Калесьнікава пад ухвальныя воклічы мітынгоўцаў.

«Мы цалкам падтрымліваем асноўны пункт у праграме Сьвятланы Ціханоўскай — правядзеньне новых сумленных выбараў», — дадала Калесьнікава.

Яна заявіла, што, паводле шматлікіх сьведчаньняў, менавіта Ціханоўская атрымала перамогу на выбарах 9 жніўня.

«Мы не супакоімся, пакуль цяперашняя ўлада ня сыдзе ў адстаўку і Беларусь ня стане свабоднай краінай», — падкрэсьліла Калесьнікава.

Акрамя таго, удзельнікі мітынгу ўхвальна ўспрынялі яе заяву, што трэба неадкладна спыніць гвалт на вуліцах беларускіх гарадоў і прыцягнуць вінаватых да адказнасьці.

«Мы патрабуем неадкладна спыніць гвалт. Ніводзін з датычных да гвалту ня быў пакараны, дагэтуль ня вызваленыя людзі з турмаў. Так ня будзе», — падкрэсьліла Калесьнікава.

Паводле яе, заўтра будзе пададзеная заява на ўзбуджэньне крымінальнай справы паводле фактаў сьмерці людзей, зьдзекаў, незаконных дзеяньняў праваахоўных органаў. Усе павінны панесьці адказнасьць згодна з законам Рэспублікі Беларусь, падсумавала яна.

«Мы патрабуем вызваліць усіх палітычных зьняволеных і затрыманых на мірных акцыях і акцыях нязгоды. І тыя больш як 4 тысячы чалавек, якія застаюцца ў турме», — дадала Калесьнікава.

18:58 16.8.2020

Загрузіць яшчэ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

XS
SM
MD
LG