Лінкі ўнівэрсальнага доступу

Беларусь пакуль не зьвярталася да АДКБ з просьбай аб дапамозе


Сьцягі краін-удзельніц АДКБ

Беларусь пакуль не зьвярталася ў сакратарыят Арганізацыі дамовы аб калектыўнай бясьпецы (АДКБ) з просьбай аб аказаньні дапамогі. Пра гэта паведаміў у суботу прэс-сакратар АДКБ Уладзімір Зайнэтдзінаў.

«Цяпер у сакратарыят АДКБ ніякіх зваротаў ад Беларусі аб аказаньні дапамогі не паступала», — адзначыў Зайнэтдзінаў.

Як ён удакладніў, у выпадку атрыманьня такога звароту ад беларускага боку ён будзе разгледжаны ва ўстаноўленым у арганізацыі парадку.

«Падставы для аказаньня дапамогі прапісаныя ў Дамове калектыўнай бясьпекі ў артыкуле 4 (прысьвечаны агрэсіі якой-небудзь краіны або краін у дачыненьні да дзяржавы-ўдзельніцы АДКБ) і ў статуце арганізацыі. Аднак усе рашэньні аб аказаньні дапамогі прымаюцца ў арганізацыі толькі пасьля правядзеньня адпаведных кансультацый з усімі дзяржавамі-ўдзельніцамі АДКБ», — растлумачыў прэс-сакратар.

Як паведаміў раней сёньня Аляксандар Лукашэнка, Расея на першы запыт акажа дапамогу ў справе забесьпячэньня бясьпекі яго краіны ў выпадку зьнешняй пагрозы. Кіраўнік Беларусі ўдакладніў, што «гаворка ідзе пра вайсковы складнік» у дамове з Расейскай Фэдэрацыяй у рамках «саюзнай дзяржавы» і АДКБ.

У артыкуле нумар 4 Дамовы аб калектыўнай бясьпецы АДКБ, у прыватнасьці, сказана, што калі супраць адной зь дзяржаваў арганізацыі адбудзецца агрэсія з боку якой-небудзь краіны або групы краін, гэта будзе разглядацца як акт агрэсіі супраць усіх удзельнікаў АДКБ. Усе дзяржавы АДКБ акажуць пацярпелай краіне-ўдзельніцы неабходную дапамогу, у тым ліку і вайсковую.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG