Лінкі ўнівэрсальнага доступу

Кіраўнік Беларускай праваслаўнай аўтакефальнай царквы заклікаў беларусаў абараніць свой выбар і будучыню


Архіяпіскап Сьвятаслаў Логін

Галава БАПЦ архіяпіскап Сьвятаслаў Логін з Канады выступіў са зваротам у сувязі з апошнімі падзеямі ў Беларусі.

Хрысьціянская вера, піша архіяпіскап, заўсёды вучыць змагацца за праўду і дабро, паважаць іншых людзей. «У гэтыя дні пакутуюць беларусы, бо бязбожная ўлада ўжыла зброю супраць свайго народу, які выйшаў на мірныя пратэсты супраць хлусьні і зла. Увесь цывілізаваны сьвет салідарны зь людзьмі, якія адстойваюць сваю годнасьць і свой голас на выбарах прэзыдэнта Беларусі і асуджаюць гвалт супраць іх».

Архіяпіскап Сьвятаслаў Логін рэзка выказваецца ў адрас кіраўніка Беларускага экзархату РПЦ мітрапаліта Паўла:

«На жаль, ня ўсе хрысьціянскія цэрквы ў Беларусі падтрымліваюць і моляцца за свой народ. Напрыклад, кіраўнік Беларускага Экзархату РПЦ (прысланы з расейскае Разані) яшчэ да афіцыйнай аб’явы пераможцы на выбарах павіншаваў дыктатара. (Сьвятое Пісьмо кажа: „Па пладах іхных пазнаеце іх“. Мц.7:16)».

Беларуская аўтакефальная праваслаўная царква, піша архіяпіскап Логін, заклікае беларускі народ абараніць свабоду свайго выбару і будучыню свае дзяржавы. «Молімся за супакой загінулых суайчыньнікаў і за здароўе параненых і зьняволеных, за ўвесь народ наш. Няхай Госпад дабраслаўляе ўсіх на добрыя справы і збаўляе нас ад лукавага».

Як паведаміў напярэдадні Свабодзе прэсавы сакратар Беларускага экзархату РПЦ айцец Сергій Лепін, мітрапаліт Павал папрасіў прабачэньня за заўчаснае віншаваньне Лукашэнкі, якое абурыла вернікаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG