Лінкі ўнівэрсальнага доступу

У Менску з 2010 году стала на 19% больш дзяцей, а ўсяго насельніцтва — толькі на 8%


Ілюстрацыйнае фота

У 2019 годзе ў Менску было 372,5 тысячы дзяцей ва ўзросьце да 18 гадоў. Гэта на 19,3% больш, чым было ў 2010 годзе, паведамілі Minsknews.by у гарадзкім статыстычным упраўленьні.

Колькасьць дзяцей павялічваецца ў беларускай сталіцы істотна хутчэй за агульнае насельніцтва: з 2010 да 2019 году ўсіх людзей у Менску стала больш на 8%.

Хлопчыкаў у Менску крыху больш, чым дзяўчынак: 190,9 тысячы супраць 181,6 тысячы. Толькі за 2019 год у Менску нарадзіліся 15,9 тысячы дзяцей, у тым ліку 249 двойняў і 9 тройняў. Больш за палову дзяцей былі ня першымі дзецьмі ў сем’ях.

Пры тым насельніцтва ўсёй Беларусі з 2010 па 2019 год ня вырасла, а толькі скарацілася — на 0,26%. Па стане на 2020 год у Беларусі жыве 9,4084 млн чалавек, у Менску — ужо больш за два мільёны.

Нараджальнасьць па краіне падае. Сумарны каэфіцыент нараджальнасьці ў 2019 годзе склаў 1,388 (у гарадах — 1,2). Гэты паказьнік меншы, чым у 1995 годзе.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG