Лінкі ўнівэрсальнага доступу

Пасярэдніка ў забойстве мальтыйскай журналісткі знайшлі парэзанага нажом


Імправізаваны мэмарыял на месцы забойства Дафнэ Каруаны Галіцыі ў Ла-Валэце, Мальта

Чалавек, які прызнаўся, што быў пасярэднікам у забойстве мальтыйскай антыкарупцыйнай журналісткі Дафнэ Каруаны Галіцыі застаецца ў крытычным стане пасьля шматлікіх нажавых ранаў на горле і тулаве, паведамілі ўлады і мясцовыя СМІ.

Мэлвін Тэума, былы таксіст, у лістападзе атрымаў памілаваньне прэзыдэнта за згоду раскрыць усе абставіны забойства з дапамогай бомбы ў аўтамабілі, учыненае на Мальце ў кастрычніку 2017 году.

Ягоныя сьведчаньні датычаць віднага бізнэсоўца Ёргена Фэнэха, меркаванага натхняльніка забойства, якога арыштавалі ў канцы лістапада і абвінавацілі ў саўдзеле ў забойстве. Ён чакае суду і адмаўляе абвінавачаньне.

«Першыя прыкметы сьведчаць, што Мэлвін Тэума нанёс сабе раненьні сам, але расьсьледаваньне працягваецца», — сказана ў паведамленьні паліцыі з падозраньнем аб спробе самагубства.

Дафнэ Каруана Галіцыя загінула 16 кастрычніка 2017 году, калі ехала ў аўтамабілі: у машыне была закладзена бомба. Журналістка займалася расьсьледаваньнем «Панамскага архіву» і выкрывала карупцыйныя сувязі высокапастаўленых мальтыйскіх чыноўнікаў і палітыкаў.

Міжнародны кансорцыюм журналістаў-дасьледчыкаў у 2016 годзе апублікаваў так званы «Панамскі архіў» — дадзеныя аб карупцыі ў найвышэйшых эшалёнах улады ў некалькіх краінах сьвету. Каруана Галіцыя на падставе гэтых дакумэнтаў заявіла, што жонка прэм’ер-міністра Мальты, верагодна, валодае афшорнай кампаніяй, якая атрымлівала грошы ад уладаў Азэрбайджану.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG