Лінкі ўнівэрсальнага доступу

Турэцкі бізнэсовец у судзе з Цапкалам 17 разоў згадаў імя яго жонкі


Бізнэсовец Сэдат Ігдэджы перад Першамайскім судом у Менску адказвае на пытаньні журналістаў

Суд Першамайскага раёну Менску прызначыў на 3 жніўня паўторнае папярэдняе пасяджэньне па пазове грамадзяніна Беларусі, бізнэсоўца турэцкага паходжаньня Сэдата Ігдэджы да Валера Цапкалы аб абароне гонару, годнасьці і дзелавой рэпутацыі.

Такое рашэньне сёньня прыняла судзьдзя Вольга Багам’я, бо адказчык Валер Цапкала ў суд не зьявіўся. Ён папрасіў прызначыць паўторнае папярэдняе пасяджэньне і паведаміць належным чынам пра месца і час яго правядзеньня. Сёньня справа разглядалася ў адсутнасьць адказчыка.

Сэдат Ігдэджы мае прэтэнзіі да выказваньняў Валера Цапкалы на яго афіцыйным канале 7 ліпеня, пры адказах на пытаньні карыстальнікаў.

Адвакат бізнэсоўца Алег Стоцкі сказаў, што Валер Цапкала паведаміў адносна Сэдата Ігдэджы несапраўдныя зьвесткі, якія ганьбяць гонар, годнасьць і дзелавую рэпутацыю падабароннага.

Паводле адваката, гэтыя зьвесткі ганьбяць, бо было сказана, што Сэдат Ігдэджы «зьяўляецца махляром і ашуканцам». Гэта дыскрэдытуе яго асобу і дзелавую рэпутацыю.

Сэдат Ігдэджы выказаў меркаваньне, што Валер Цапкала зрабіў такія заявы з прычыны абвінавачаньняў у хабары. Сэдат Ігдэджы ў судзе згадаў зьвесткі, якія выклаў раней у заяве генпракурору аб проціпраўнай дзейнасьці Цапкалы, тэкст якой трапіў у СМІ. Таксама ён зноў расказаў пра будаўніцтва дома Цапкалы.

У сёньняшнім выступе ў судзе Сэдат Ігдэджы 17 разоў назваў імя жонкі Валера Цапкалы Веранікі, хоць у заяве ў Генпракуратуру ён яе амаль ня згадваў. Сэдат Ігдэджы сказаў, што вырашыў апублікаваць зьвесткі пра Валера Цапкалу, калі той заявіў пра свае прэзыдэнцкія амбіцыі і прадаў дом. Маўляў, беларускі народ павінен ведаць, хто такія Вераніка і Валер Цапкалы. Сэдат Ігдэджы сказаў, што любіць палітыку Аляксандра Лукашэнкі, хоць асабіста зь ім не знаёмы.

Пасьля паседжаньня суду Сэдат Ігдэджы сказаў журналістам, што «калі трэба», можа падаць заяву ў Генпракуратуру і на Вераніку Цапкалу.

Суд далучыў да справы матэрыялы, якія падаў пазоўнік, пра пералічэньне грошай на афшорныя кампаніі, якімі нібыта кіраваў Цапкала, пра адпачынак сям’і Цапкалаў, а таксама дакумэнты, якія тычацца будаўніцтва дома. Паводле адваката, яны пацьвярджаюць матывы Цапкалы — чаму ён паведаміў непраўдзівыя зьвесткі:

«Каб мы скептычна ставіліся да гэтых дакумэнтаў і лічылі, што яны нічога не пацьвярджаюць. Такім чынам ён спрабаваў дыскрэдытаваць зварот Сэдата Ігдэджы ў праваахоўныя органы», — сказаў адвакат.

У пазове Сэдат Ігдэджы патрабуе выдаліць відэа «Прамое ўключэньне Валера Цапкалы» за 7 ліпеня з Youtube-канала. І разьмясьціць абвяржэньне, што відэа выдалена, «бо часткова ўтрымлівала зьвесткі, якія не адпавядаюць рэчаіснасьці і ганьбяць гонар, годнасьць і дзелавую рэпутацыю Сэдата Ігдэджы».

Раней Сэдат Ігдэджы падаў заяву ў Генэральную пракуратуру па «фактах супрацьпраўнай дзейнасьці» патэнцыйнага кандыдата ў прэзыдэнты Валера Цапкалы.

Цапкала пакуль ня мае намеру зьяўляцца на пасяджэньне суду

Кіраўнік штабу Валера Цапкалы Аляксей Урбан сказаў карэспандэнту Свабоды праз тэлефон, што Валер Цапкала ня будзе камэнтаваць пазоў Сэдата Ігдэджы і пакуль ня мае намеру зьяўляцца на пасяджэньне суду. Паводле юрыста Цапкалы, нават у адкрытых крыніцах можна знайсьці зьвесткі, «якія поўнасьцю пацьвярджаюць меркаваньне Цапкалы пра гэтага чалавека».

«Пазыцыя абароны будзе агучана толькі ў судзе», — заявіў Урбан.

Напрыканцы чэрвеня Сэдат Ігдэджы падаў заяву ў Генэральную пракуратуру па «фактах супрацьпраўнай дзейнасьці» патэнцыйнага кандыдата ў прэзыдэнты Валера Цапкалы. Аднак дагэтуль пракуратура не паведаміла бізнэсоўцу пра вынікі разгляду заявы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG