Лінкі ўнівэрсальнага доступу

Стала вядома, у чым абвінавачваюць Віктара і Эдуарда Бабарыкаў


Віктар Бабарыка

Прэтэндэнта ў прэзыдэнты Беларусі Віктара Бабарыку абвінавачваюць у адмываньні грошай, ухіленьні ад сплаты падаткаў і даваньні хабару.

Гэта вынікае са сьпісу крымінальных спраў апэляцыйнай інстанцыі, якія разглядае судовая калегія Менскага гарадзкога суду. Сьпіс сфатаграфавала прэс-служба Віктара Бабарыкі.

Віктара Бабарыку абвінавачваюць паводле трох артыкулаў Крымінальнагаа кодэксу Беларусі:

  • ч.2 арт. 235 КК («Адмываньне» грошай, атрыманых злачынным шляхам, паўторна, з выкарыстаньнем службовых паўнамоцтваў або ў асабліва буйным памеры; пагражае ад 4 да 7 гадоў пазбаўленьня волі са штрафам);
  • ч. 2 арт. 243 КК (Ухіленьне ад сплаты падаткаў і збораў у асабліва буйным памеры; да 5 гадоў абмежаваньня або ад 3 да 7 гадоў пазбаўленьня волі са штрафам);
  • ч.2 арт. 431 КК (Даваньне хабару паўторна або ў буйным памеры; да 5 гадоў абмежаваньня або ад 2 да 7 гадоў пазбаўленьня волі).

Ягонага сына Эдуарда Бабарыку — ва ўхіленьні ад сплаты падаткаў і збораў у асабліва буйным памеры (ч. 2 арт. 243 КК).

Сьпіс крымінальных спраў апэляцыйнай інстанцыі, які разглядае судовая калегія Менскага гарадзкога суда. Фота прэс-службы Віктара Бабарыкі
Сьпіс крымінальных спраў апэляцыйнай інстанцыі, які разглядае судовая калегія Менскага гарадзкога суда. Фота прэс-службы Віктара Бабарыкі

У тым жа сьпісе фігуруюць яшчэ два прозьвішчы людзей, якія праходзяць па так званай «справе Белгазпрамбанку».

  • Дзьмітры Карака — асабісты памочнік і каардынатар ініцыятыўнай групы Віктара Бабарыкі, яго абвінавачваюць ва ўхіленьні ад выплаты падаткаў, па ч. 2 арт. 243 КК,
  • Антон Марозаў — працаваў у юрыдычным аддзеле «Белгазпрамбанку», а таксама зьяўляецца намесьнікам старшыні назіральнай рады страхавога таварыства «Кентаўр» і мае долю ў кампаніі «ПрыватЛізінг»; яго абвінавачваюць па па ч.2 арт. 235 і ч.2 арт. 243 Крымінальнага кодэксу.

Перасьлед Віктара Бабарыкі і яго прыхільнікаў. Што важна ведаць

  • 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць людзей, калі тыя адмаўляюцца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
  • 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў па арт. 235 (легалізацыя сродкаў, здабытых злачынным шляхам у асабліва буйным памеры) і арт. 243 (ухіленьне ад выплаты падаткаў у асабліва буйным памеры) Крымінальнага кодэксу.
  • Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога капрамату на яго.
  • 11 чэрвеня арыштавалі каардынатарку выбарчага штабу Бабарыкі Сьвятлану Купрэеву, яе вінавацяць ва ўхіленьні ад выплаты падаткаў у асабліва буйным памеры.
  • 12 чэрвеня Лукашэнка заявіў, што Бабарыка таксама датычны да справы, маўляў «​гэта адна шайка-лейка»​ і безь яго ведама нічога не рабілася. Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
  • Усяго па «справе „Белгазпрамбанку“» праходзяць каля 20 чалавек.
  • 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскаія акцыянэры банка («Газпромбанк» і «Газпром») назвалі гэтае рашэньне незаконным.
  • 17 чэрвеня арыштавалі выбарчы фонд Віктара Бабарыкі з 100 тысячамі рублёў на рахунку. Афіцыйных тлумачэньняў штабу кандыдата тады не далі.
  • Раніцай 18 чэрвеня затрымалі Віктара Бабарыку і яго сына ды кіраўніка ініцыятыўнай групы Эдуарда Бабарыку. У дамах сям’і Бабарыкаў прайшлі ператрусы.
  • «Бабарыку затрымалі праз тое, што ён зьяўляўся непасрэдным арганізатарам супрацьпраўнай дзейнасьці, спрабаваў узьдзейнічаць на сьведак, схаваць сьляды раней зьдзейсьненых злачынстваў, і літаральна днямі Бабарыка спрабаваў зьняць буйную суму грошай з падкантрольных яму рахункаў», — сказаў кіраўнік Камітэту дзяржкантролю Іван Тэртэль, расказваючы пра нібыта махлярскую схему з адмываньнем грошай з удзелам былых і дзейных топ-мэнэджэраў «Белгазпрамбанку».
  • Віктар і Эдуард Бабарыкі знаходзяцца ў СІЗА КДБ. Ім прад'явілі абвнавачаньне, артыкул не называецца.
  • Праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы
  • 19 чэрвеня Штаб Бабарыкі падрыхтаваў да здачы 435 тысяч подпісаў.
  • 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
  • «Трэба — сядуць». Што Лукашэнка казаў пра Бабарыку цягам двух тыдняў перад яго затрыманьнем

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG