Лінкі ўнівэрсальнага доступу

Замежніца заявіла, што ў яе зьніклі 170 тысяч даляраў зь ячэйкі ў «Белгазпрамбанку»


Грамадзянка Ўкраіны зьвярнулася ў міліцыю і да Аляксандра Лукашэнкі.

Грамадзянка Ўкраіны аказалася сярод пацярпелых кліентаў «Белгазпрамбанку», у якіх пасьля ператрусу ў галаўным офісе банку зьнікла зьмесьціва дэпазытных ячэек, паведамляе Tut.by. Паводле яе слоў, у яе там было больш за 170 тысяч даляраў.

Замежніца напісала заяву ў міліцыю, а таксама зьвярнулася з электронным зваротам на сайт Лукашэнкі.

У ГУУС Менгарвыканкаму пацьвердзілі факт заявы ад грамадзянкі Ўкраіны.

Марына кажа, што разглядала магчымасьць адкрыць бізнэс у Беларусі. Магчыма, укласьці грошы ў нерухомасьць. Але пасьля таго, што адбылося, кажа, няма жаданьня.

8 ліпеня грамадзянцы Ўкраіны трэба вярнуцца дадому. Яна спадзяецца, што сытуацыя з яе зьніклымі грашыма да таго часу праясьніцца.

У банку ёй адказалі, што перадалі зварот у Дэпартамэнт фінансавых расьсьледаваньняў Дзяржкантролю, бо «зварот зьмяшчае пытаньні, вырашэньне якіх не адносіцца да кампэтэнцыі „Белгазпрамбанку“».

Марына плянуе зьвяртацца ў іншыя беларускія інстанцыі, у тым ліку пры неабходнасьці ў Генпракуратуру, а калі ня ўдасца вырашыць пытаньне — то і ў міжнародныя арганізацыі.

Некаторыя кліенты «Белгазпрамбанку» напісалі заявы ў банк, што дэпазытарныя ячэйкі ўскрываліся бязь іх прысутнасьці, і тое, што там захоўвалася, прапала. Гэта выявілася, калі яны на мінулым тыдні змаглі праверыць іх зьмесьціва.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG