Міністэрства разьвіцьця эканомікі, гандлю і сельскай гаспадаркі Ўкраіны ў інтарэсах пяці нацыянальных вытворцаў пачало антыдэмпінгавае расьсьледаваньне аб пастаўках фанэры зь Беларусі. Вытворцы паскардзіліся на дэмпінгавыя цэны і аб’ём беларускіх паставак.
Як адзначаюць у супольнай заяве ўкраінскія прадпрыемствы, цягам апошніх трох гадоў аб’ём паставак беларускай фанэры ва Ўкраіну вырас у абсалютных велічынях на 691%, а ў спажываньні і вытворчасьці гэтай прадукцыі ва Ўкраіне адпаведна на 559% і 858%. Пры гэтым пастаўкі ішлі за дэмпінгавыя цэны.
Папярэдне прааналізаваўшы інфармацыю, Міністэрства эканомікі палічыла, што такая сытуацыя на рынку можа спрычыніць шкоду ўкраінскім вытворцам.
Згодна з заканадаўствам Украіны тэрмін правядзеньня антыдэмпінгавага расьсьледаваньня не павінен перавышаць 270 дзён, а ў надзвычайных абставінах можа быць падоўжаны да 330 дзён. Цяпер Міністэрства разьвіцьця эканомікі, гандлю і сельскай гаспадаркі Ўкраіны абвясьціла рэгістрацыю зацікаўленых бакоў, якія цягам двух месяцаў павінны ў пісьмовым выглядзе накіраваць камэнтары да сытуацыі з пастаўкамі фанэры зь Беларусі.
Што ўжо знаходзіцца пад украінскім антыдэмпінгам
- Найбліжэйшым часам Украіна мае абвясьціць вынікі пачатага ў жніўні 2019 году антыдэмпінгавага расьсьледаваньня што да азотных угнаеньняў зь Беларусі, краін Эўразьвязу, Турэччыны, Казахстану, Грузіі, Кітаю і ЗША. Папярэдне прадстаўнікі ўраду Ўкраіны анансавалі ўвядзеньне квотаў на нітрат амонію, вапна-аміячную салетру, карбамід і карбаміда-аміячныя сумесі. Гэтая прадукцыя займае істотную частку ў гандлі Беларусі з Украінай.
- Сёлета ў траўні Ўкраіна абмежавала пастаўкі беларускіх запалак на ўкраінскі рынак антыдэмпінгавым мытам у памеры 21,32%.
- З 26 сакавіка набыло моц рашэньне Ўкраіны аб увядзеньні антыдэмпінгавага мыта на пастаўкі зь Беларусі будаўнічых блёкаў зь цеплаізаляцыйнага бэтону ў памеры 34,19% ад мытнай вартасьці прадукцыі.
- 1 лютага 2019 году міжведамасная камісія міжнароднага гандлю канчаткова ўвяла абмежаваньні паставак прадукцыі Берасьцейскага электралямпавага заводу на пяць гадоў (да 2 сакавіка 2023 году).
- У траўні 2019 году Ўкраіна на пяць гадоў абмежавала мытам у 57,03% пастаўкі зь Беларусі цэмэнтных клінкераў і портляндцэмэнту.
- Кампрамісным стала рашэньне міжведамаснай камісіі наконт паставак ва Ўкраіну прадукцыі «Мазырсолі» — кампанія ня будзе выплачваць антыдэмпінгавы збор, але мусіць прытрымлівацца пэўных цэнавых абавязаньняў.
