Лінкі ўнівэрсальнага доступу

Кантрабандысты Пясецкага і лекцыя пра беларускія напоі. Беларускае жыцьцё онлайн на гэтым тыдні


Нефармальны карантын працягваецца. Сабралі для вас самыя цікавыя онлайн-актыўнасьці на тыдзень з 22 па 28 чэрвеня.

«Літаратары на карантыне»

У праекце Радыё Свабода на працягу бліжэйшых месяцаў можна паслухаць і паглядзець чытаньні ад вядомых беларускіх аўтараў — паэтаў, празаікаў, эсэістаў і перакладчыкаў. На гэтым тыдні для вас чытаюць:

  • 23 траўня, 19:00 — беларуская ўкраінскамоўная пісьменьніца Наталка Бабіна чытае фрагмэнт сваёй кнігі «Бодай, будка».
  • 25 траўня, 19:00 Севярын Квяткоўскі чытае фрагмэнт свайго раману «Каларадзкая пушча».
  • 27 траўня, 19:00 — пісьменьнік і перакладчык Павал Касьцюкевіч чытае ў сваім перакладзе з іўрыту фрагмэнт раману Мэндэлэ Мойхер Сфорыма «Падарожжы Бэньяміна Трэцяга».
  • 28 траўня, 19:00Сяргей Дубавец чытае і камэнтуе свой пераклад кнігі Станіслава Шумскага «У бітвах і вязьніцах». Гэта сёмы фрагмэнт сэрыі, якая зьяўляецца на каналах Свабоды па нядзелях. У гэтай сэрыі — пра Касьцюшку, Зайчыка і Сьвінку.
  • Усе чытанні праходзяць на нашым YouTube канале Свабода Падкасты.

«Тут быў Шагал»

Галерэя «Арт-Беларусь» прапануе ўбачыць, як цяпер выглядае калекцыя Белгазпромбанка. Месца карцін, якія далучылі да крымінальнай справы, занялі незвычайныя сымбалі. Відэа дапаможа разабрацца ў творчасьці Шагала і Суціна і зразумець, чаму «Ева» стала сымбалем свабоды самавыяўленьня.

«Гадзіна смутку і маўчання»

Так называецца фільм-выстава фатографа Ўладзіміра Сапагова, створаны Праваабарончым цэнтрам «Вясна» і Цэнтрам даследваньняў грамадзянскай супольнасці Беларусі. Фільм паказвае мітынг 26 красавіка 1989 года, прысьвечаны Чарнобыльскай катастрофе.

«У 1989 годзе тэма Чарнобыльскай катастрофы ў Беларусі прагучыць надзвычай востра і актуальна. Улады будуць змушаныя распачаць сур’ёзныя дзеяньні па зьмяншэньні наступстваў ядзернай катастрофы. Выстава набывае надзвычайную актуальнасьць і сымбалізм зараз, напярэдадні пуску Беларускай атамнай электрастанцыі ў Астраўцы, заплянаваным на пачатак ліпеня,» — адзначаецца ў апісаньні.

Убачыць нумізматычныя калекцыі

Нацыянальны гістарычны музэй працягвае відэа-знаёмствы са сваімі экспанатамі. У чарговым выпуску можна ўбачыць адзін з найбольш адметных нумізматычных комплексаў, што ўваходзіць у экспазыцыю «Ад рымскага дынарыя да беларускага рубля».

Навучыцца рабіць выцінанку

Онлайн майстар-кляс па выцінанцы ад Натальлі Сухой ладзіць арганізацыя «Традыцыя». Удзельнічаць могуць і дзеткі, і дарослыя. Ніякіх ведаў не патрабуецца, дастаткова мець пару інструмэнтаў, кшталту нажніц, клей, а таксама добры настрой!

Онлайн-спэктакаль ад Свабоднага тэатру

Беларускі Свабодны тэатар працягвае заставацца на самаізаляцыі і паказваць сваю онлайн-прэм’еру — спэктакаль «Школа для дураков» паводле аднайменнага раману Сашы Сакалова. Чарговы паказ спэктаклю адбудзецца ў чацьвер 25 чэрвеня а 20:00. Каб паглядзець, неабходна зарэгістравацца праз гугл-форму.

Лекцыя пра беларускія напоі

Цэнтар гарадзкога жыцьця ў Горадні працягвае цыкль «Адкрытыя лекцыі ў часе пандэміі».

«Гісторык Андрэй Вашкевіч занурыўся ў канец XIX стагодзьдзя і захапляльна апавядае: што з сябе ўяўляў чарачны водкуп расейскіх уладаў; чаму чыноўнікі апячатвалі кожны самагонны апарат; наша гарэлка была добрая, але найбольш цанілася замежная, асабліва гданьская, тая што з залатым лістом; хто ў Гродне гнаў гарэлку з разынак — малагу; чаму віно гэта вам не віно, а гарэлка гэта вам не "водка"; якая была смачней: белагалоўка ці чырвонагалоўка,» — адзначаюць у апісаньні.

«Творчая кухня» з пісьменніцай Ганнай Янкутай

У супольным праекце «Беларускага ПЭН-цэнтру» і Эўрарадыё можна пазнаёміцца з творчасьцю беларускай перакладчыцы і пісьменьніцы Ганны Янкуты.

«Ганна раскажа пра тое, як зрабілася пісьменьніцай для дзяцей, пра кнігі, галоўны герой якіх Кот Шпрот. Увагай ня будзе абмінутая перакладчыцкая дзейнасьць Ганны і апошнія некалькі кніг у ейным перакладзе. Таксама абмяркуем разам лёс часопіса перакладной літаратуры "ПрайдзіСьвет". Ганна пачытае ўрывак з кнігі "Пыха і перадузятасьць" Джэйн Остэн, вершы Георга Гайма,» — значыцца ў апісаньні.

Сустрэча адбудзецца 23 чэрвеня а 19-й гадзіне ў сацыяльных сетках.

«Санаторый пад клепсыдрай»

Падчас восьмай сустрэчы Андрэй Хадановіч паразмаўляе з перакладчыцай двух раманаў Сяргея Пясецкага Марыяй Пушкінай.

«Як жылі кантрабандысты ў час, калі Менск і Ракаў належалі розным краінам? Як Ракаў зрабіўся месцам, дзе працавалі сто рэстаранаў і кавярняў з аркестрам? Як астраномія дапамагае ў крымінальным бізнэсе і ў каханьні? Як зацяты антысаветчык "улез у скуру" афіцэра Чырвонай арміі і што з гэтага выйшла? Чаму "менская" трылёгія так напраўду называецца "зладзейскай" і што трэба ведаць пра Менск — крымінальную сталіцу рэгіёну?» — пра гэта і ня толькі абяцаюць расказаць падчас сустрэчы, якая распачнецца 23 чэрвеня а 17-й гадзіне на старонцы Польскага інстытуту ў Менску.

Паглядзець дакумэнталку пра Быкава

Да дня нараджэньня пісьменьніка Дзяржаўны музэй гісторыі беларускай літаратуры падзяліўся запісам дакумэнтальнага фільму «Радаваньне пра Васіля», створаным пры падтрымцы кінастудыі «Беларусьфільм».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG