Амбасадар Расеі ў Беларусі Дзьмітрый Мезенцаў заявіў, што Аляксандр Лукашэнка прыняў запрашэньне прысутнічаць на парадзе Перамогі ў Маскве.
«Мы ўдзячныя кіраўніку беларускай дзяржаў за гатоўнасьць прыняць удзел ва ўрачыстасьцях 24 чэрвеня ў Маскве ў гонар Вялікай Перамогі. (...) Запрашэньне Ўладзіміра Уладзіміравіча Пуціна прынятае прэзыдэнтам Беларусі », — сказаў Мезенцаў журналістам у сераду ў Менску.
У аўторак Лукашэнка пацьвердзіў удзел беларускага боку ў парадзе Перамогі ў Маскве 24 чэрвеня.
«Як жа: беларусы правялі парад 9 траўня, а Расея не правяла — трэба праводзіць. Ну, паедзем правядзем парад», — заявіў кіраўнік краіны падчас паездкі ў Горадні. Разам з тым Лукашэнка не ўдакладніў, ці паедзе ён сам на парад.
Раней прэс-сакратар Міністэрства абароны рэспублікі Натальля Гаўрусік паведаміла, што на парадзе ў Маскве плянуе прысутнічаць міністар абароны Беларусі Віктар Хрэнін.
