Лінкі ўнівэрсальнага доступу

«Прамога кампрамату на мяне няма». Бабарыка заявіў пра цынізм дзеяньняў уладаў


Віктар Бабарыка
Віктар Бабарыка

Каманда Віктара Бабарыкі перад прэсавай канфэрэнцыяй правяла кароткі стрым са свайго штабу, які знаходзіцца на вуліцы Харужай у Менску. У гэты час у «Белгазпрамбанку» і іншых кампаніях, зьвязаных зь яго сябрамі, праходзяць ператрусы.

Стрым доўжыўся некалькі хвілінаў. Віктар Бабарыка заявіў, што ператрусы ў ягоных сяброў і калегаў праводзяць таму, што прамога кампрамату на яго няма.

«Сёньня пачалі адбывацца дзеяньні, якія паказваюць з поўнай яснасьцю, што прадстаўнікі сёньняшняй улады рэальна гатовыя выкарыстоўваць любыя сродкі для недапушчэньня ў нашай краіне сумленных выбараў. Увесь цынізм гэтых дзеяньняў палягае ў тым, што яны накіраваныя не на мяне, яны накіраваныя на маіх сяброў, на людзей, зь якімі я працаваў. Чаму гэта зроблена? Таму што прамога кампрамату на мяне няма, і ёсьць вялікая надзея, што людзей запужаюць, прымусяць гаварыць няпраўду, агаворваць сябе і іншых людзей.

Я магу з дакладнасьцю заявіць, што адзіным правільным спосабам паводзінаў у гэтай сытуацыі і адказам на самавольства і беззаконьне зьяўляецца працяг нашых дзеяньняў, працяг нашай барацьбы», — заявіў Бабарыка падчас стрыму.

З раніцы 11 чэрвеня ў галаўным офісе «Белгазпрамбанку», а таксама ў кампаніях «ПрыватЛізінг», «Кентаўр», «Кампары» праходзяць ператрусы. Дэпартамэнт фінансавых расьсьледаваньняў Дзяржкантролю пачаў крымінальную справу паводле ч. 2 арт. 243 «Ухіленьне ад выплаты падаткаў і збораў у асабліва буйным памеры» і ч. 2 арт. 235 «Легалізацыя сродкаў, атрыманых злачынным шляхам, у асабліва буйным памеры».

Раней Віктар Бабарыка распавёў Tut.by, што ў штабе ініцыятыўнай групы ўсё спакойна.

«Ні ў нашых супрацоўнікаў, ні ў нашых сябраў групы нічога такога не адбываецца. Ведаю, што ператрус праходзіць у людзей, непасрэдна зьвязаных са мной. Але яны не супрацоўнікі банка, проста мае сябры, яны могуць ведаць тых, хто праходзіць па справе ў якасьці падазраваных. Але прозьвішчаў жа мы ня ведаем, хто праходзіць па справе. Гэта толькі маё меркаваньне», — сказаў Бабарыка.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG