Лінкі ўнівэрсальнага доступу

Улады Кіргізстану абвінавацілі журналістаў Радыё Свабода ў атрыманьні хабару


Самідын-уулу Сагынбек, кіраўнік сьледчай групы службы бясьпекі Кіргізстану
Самідын-уулу Сагынбек, кіраўнік сьледчай групы службы бясьпекі Кіргізстану

Служба дзяржаўнай бясьпекі Кіргізстану зрабіла неабгрунтаваныя заявы пра тое, што журналісты кіргіскай службы Радыё Свабода атрымалі 100 тысяч даляраў ад чалавека, які, на яго ўласнае прызнаньне, займаўся адмываньнем грошай і зьяўляўся крыніцай інфармацыі для журналістаў у буйным антыкарупцыйным расьсьледаваньні, якое Свабода вяла ў Кіргізстане.

Заява была прад'яўлена сьледчымі 2-га чэрвеня на слуханьнях у парлямэнце ў справе аб забойстве Аеркена Саймаіці, кітайскага бізнэсоўца ўйгурскага паходжаньня, які на працягу некалькіх гадоў выводзіў з Кіргізстану сотні мільёнаў даляраў.

Прэзыдэнт Радыё Свабодная Эўропа / Радыё Свабода (РСЕ / РС) Джэймі Флай заявіў, што абвінавачаньні, відавочна, ёсьць «помстай» журналістам з боку «карумпаваных людзей, якія імкнуцца абараніць сваё багацьце і ўладу».

Да забойства Саймаіці, якое адбылося ў лістападзе ў Стамбуле, ён даў рэпартэрам мноства фінансавых справаздач, якія паказваюць, як ён вывеў грошы з Кіргізстану з дапамогай грашовых пераводаў і кантрабандыстаў.

Пасьля сьмерці Саймаіці кіргіская служба Радыё Свабода, Цэнтар дасьледаваньня карупцыі і арганізаванай злачыннасьці (OCCRP) і кіргізстанскі сайт Kloop апублікавалі расьсьледаваньне пад назвай «Рабаваньне і заступніцтва ў сэрцы Цэнтральнай Азіі».

Расьсьледаваньне, у якім таксама быў замяшаны намесьнік старшыні Дзяржаўнага мытнага агенцтва Кіргізстану Раімбек Матраімаў — журналісты абвінавацілі яго ў карупцыі, зьвязанай з грашыма, вывезенымі Саймаіці з краіны — выклікала вулічныя пратэсты ў Кіргізстане пасьля публікацыі ў лістападзе.

Матраімаў і яго сваякі адмаўлялі якія-небудзь сувязі з Саймаіці, а таксама выпадкі карупцыі ў мытнай службе Кіргізстану. Ён і яго сямʼя падалі пазоў аб паклёпе супраць аўтараў расьсьледаваньня.

Самідын-уулу Сагынбек, кіраўнік сьледчай групы службы бясьпекі, паведаміў парлямэнцкай камісіі, што сьледчыя атрымалі паказаньні ад двух сьведак, якія заявілі, што Саймаіці заплаціў 100 тысяч даляраў журналістам з кіргіскай службы Радыё Свабода (Радыё Азатык).

На пытаньне журналіста Радыё Азатык, ці ёсьць у сьледчых іншыя доказы меркаванай аплаты, Сагынбек адказаў адмоўна.

Алі Тактакунаў, журналіст Радыё Азатык, які ўзначальваў працу над расьсьледаваньнем, атрымліваў пагрозы расправы ў сувязі з публікацыяй і стаў адным з пазваных у справе аб паклёпе.

Кіраўнік РСЕ / РС пацьвердзіў, што раней сёлета Матраімаў паспрабаваў замарозіць банкаўскі рахунак Радыё Азатык.

«Мы асуджаем такія спробы скажаць праўду і зноў заклікаем кіргізстанскія ўлады гарантаваць, каб асобы, адказныя за пагрозы і спробы запалохаць журналістаў, зьвязаных з гэтай гісторыяй, былі прыцягнутыя да адказнасьці за свае дзеяньні», — дадаў ён.

У заяве OCCRP гаворыцца, што Служба бясьпекі Кіргізстану «засяродзілася на расьсьледаваньні справы аб забойстве ахвяры — аднаго з крыніц гэтай гісторыі — і на саміх журналістах».

«Агенцтва абапіралася на двух сьведак, адзін зь якіх сьцьвярджаў, што журналісты выкарысталі сфабрыкаваныя дакумэнты, а другі — што рэпартэр Радыё Свабода неналежна сябе паводзіў. Ніводнае з гэтых сьцьвярджэньняў не было падтрымана дакумэнтальнымі доказамі, абодва абвінавачаньні заснаваныя на чутках», — гаворыцца ў заяве OCCRP.

Расьсьледаваньне, праведзенае РСЕ / РС, OCCRP, атрымала прэстыжную прэмію імя Тома Рэнэра за 2019 год, заснаваную некамэрцыйнай арганізацыяй Investigative Reporters and Editors за найбольш выдатныя рэпартажы аб арганізаванай злачыннасьці.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG