З пачатку чэрвеня беларускія перавозчыкі часткова аднавілі аўтобусныя рэйсы ў Беласток, Варшаву, Гданьск.
Каранавірус у Беларусі і ў сьвеце. Як разьвіваюцца падзеі >>
Горадзенскае транспартнае агенцтва «Фаварыт» зь 1 чэрвеня аднаўляе паездкі з Горадні ў Беласток і Варшаву. У Беласток штодня, апрача нядзелі, будзе хадзіць па 1-2 рэйсы, у Варшаву — тры дні на тыдзень па 1 рэйсе.
На сайце ticketbus.by, які разьмяшчае рэйсы зь дзяржаўных аўтавакзалаў, цяпер таксама можна набыць білеты ў Польшчу. З Горадні ў Беласток пасьля перапынку пачала вазіць пасажыраў горадзенская кампанія «Зэт».
Як расказалі ў кампаніі «Інтакс», першыя тэставыя рэйсы з Горадні на Беласток пасьля доўгага перапынку паедуць 3 чэрвеня: у 6.30 і 9.20. Далейшы расклад пакуль невядомы.
Трапіць у Польшчу цяпер можна і зь Менску безь перасадак. Зь Менску (праз Горадню, Беласток, Варшаву) у Гданьск пусьцілі аўтобусы лідзкага аўтапарку і польскай кампаніі з Гданьску.
Як паведамляецца на сайце транспартнага агенцтва «Фаварыт», кожны чалавек, які праходзіць беларуска-польскую мяжу, павінен быць у ахоўнай масцы. Гэта патрабаваньне памежных службаў. Транспарт пасьля кожнага рэйсу дэзынфікуецца.
Выехаць у Польшчу пакуль могуць толькі некаторыя групы пасажыраў:
- грамадзяне Польшчы;
- сужэнцы і дзеці грамадзянаў Польшчы;
- тыя, хто мае «карту паляка» і від на жыхарства ў Польшчы («карту побыту»);
- студэнты польскіх навучальных устаноў;
- кіраўнікі амбасадаў і супрацоўнікі дыпляматычнай і консульскай місіі, а таксама іхныя сваякі;
- людзі, якія маюць права пастаянна або часова пражываць у Польшчы;
- іншаземцы, якія маюць дазвол на працу ў Польшчы;
- кіроўцы, якія перавозяць тавары адпаведным транспартам.
Усе, акрамя кіроўцаў і іншых транспартнікаў, сэзонных работнікаў і студэнтаў, маюць прайсьці 14-дзённы карантын пасьля прыезду ў Польшчу.
Польшча праз пандэмію каранавірусу закрыла межы для ўезду іншаземцаў з 15 сакавіка.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
