Пакістан афіцыйна пацьвердзіў гібель 97 чалавек у авіякатастрофе каля горада Карачы, паведамляе Reuters.
Паводле ўдакладненых зьвестак, на борце пасажырскага самалёту Airbus A320 авіякампаніі Pakistan International Airlines (PIA), рэйс PK 8303, які 22 траўня выконваў рэйс з Лагора ў Карачы, знаходзіліся 99 чалавек, зь іх 97 загінулі, двое выжылі. Самалёт упаў на жылыя дамы, сярод іх жыхароў сьмерцяў не зафіксавана.
Вядома, што за некалькі сэкундаў да катастрофы пілёт паведаміў авіядыспэтчарам пра праблемы з рухавікамі. Прычына катастрофы высьвятляецца.
