Лінкі ўнівэрсальнага доступу

«Стаўленьне лекараў да каранавірусных было вельмі грэблівае». Заслужаны артыст Беларусі расказаў, як перажыў хваробу


Заслужаны артыст Беларусі Генадзь Забара з унукамі

Генадзь Забара, які перахварэў на цяжкую пнэўманію і COVID-19, пабачыў і лекараў-супэрпрафэсіяналаў, і мэдыкаў, якія ставяцца да каранавірусных грэбліва. На яго думку, шмат людзей заражаюцца каранавірусам менавіта ў шпіталях: у адну палату кладуць і інфікаваных, і пацыентаў зь іншымі дыягназамі.

Каранавірус у Беларусі і ў сьвеце. Як разьвіваюцца падзеі >>

Заслужаны артыст Беларусі, клярнэтыст Генадзь Забара паўтара месяца правёў у шпіталях — спачатку трапіў у кардыялёгію 2-й лякарні і там падхапіў каранавірус. Потым лячыўся ў 6-й лякарні — ад двухбаковай пнэўманіі і COVID-19. Днямі Генадзя Іванавіча выпісалі. На ўсялякі выпадак пакуль ён ізаляваўся ад сям’і — паехаў на лецішча і працягвае «карантыніць з сабачкам».

«У прыёмным пакоі мяне афармлялі шэсьць гадзін»

На пачатку красавіка Генадзь Забара зьвярнуўся ў паліклініку да тэрапэўта з сардэчнымі праблемамі: арытміяй, задышкай, вельмі нізкім гемаглябінам. Там яго абсьледавалі і ўжо ня выпусьцілі — адразу накіравалі ў аддзяленьне кардыялёгіі 2-й лякарні.

«Прыёмны пакой 2-й лякарні — гэта асобная гісторыя. Мяне афармлялі цягам 6 гадзін. Усе бегаюць, мітусяцца: „Як? Вам яшчэ не зрабілі аналізы?“ А абсьледаваньні быў стандартныя: кардыяграма, аналіз крыві і кампутарная тамаграфія. Гэтыя 6 гадзін мне давялося знаходзіцца ў атачэньні бамжоў, алькаголікаў, ну і нармальныя людзі былі», — прыгадвае залужаны артыст.

Паклалі яго ў кардыялёгію. Спачатку аднаго ў палату. Потым падсялілі яшчэ двух пажылых мужчын з пнэўманіяй. У пятніцу ва ўсіх узялі тэсты на каранавірус і пакінулі разам на выходныя. У аўторак прыйшлі вынікі: у дваіх тэсты станоўчыя, у Генадзя Забары — адмоўны.

«Ланцуговая рэакцыя: спачатку заразілі мяне, потым, магчыма, некага і я»

Як «кантакт першага ўзроўню» клярнэтыста тэрмінова выпісалі з кардыялёгіі і накіравалі дадому на самаізаляцыю — спадар Забара зьехаў на лецішча, як мага далей ад сям’і, жонкі, дзяцей і ўнукаў, якія засталіся ў гарадзкой кватэры. Праз пару дзён тэмпэратура паднялася да 39,2. Былі выходныя, ён дачакаўся панядзелка і сам паехаў «здавацца» ў 2-ю лякарню.

Генадзь Забара зь сям'ёй
Генадзь Забара зь сям'ёй

«Спачатку мяне пасялілі ў палату асобна, узялі тэст. А на наступны дзень падсялілі яшчэ трох чалавек. Праз пару дзён мне тэлефануюць зь лябараторыі і паведамляюць, што маю станоўчы тэст на каранавірус. Астатнія пацыенты ўсё гэта чуюць. Атрымліваецца, я мог яшчэ трох заразіць. Вось такая ланцуговая рэакцыя атрымалася: спачатку заразілі мяне, потым, магчыма, я.

Калі я ляжаў у 2-й лякарні, вокны палаты выходзілі на прыёмнае аддзяленьне: я бачыў вялізную чаргу з машын «хуткай дапамогі», — успамінае Генадзь Іванавіч.

Прыкладна ў тыя ж дні ў 2-ю лякарню трапіў і старэйшы брат Генадзя, зь якім ён у апошні час ня бачыўся. Брата паклалі з двухбаковай пнэўманіяй, першы тэст на каранавірус быў адмоўны. Але ў шпіталі брат таксама падчапіў каранавірус — у палаце былі інфікаваныя каранавірусам. У яго хвароба праходзіла крыху лягчэй, днямі брата таксама выпісалі.

«На мой погляд, шпіталі ўсе перапоўненыя — інакш як магло такое адбыцца, што я зь нявызначаным дыягназам ляжаў у адной палаце з каранавіруснымі, і брат мой паступіў з пнэўманіяй і адмоўным тэстам, а празь некалькі дзён тэст стаў станоўчым?» — разважае заслужаны артыст.

«Мне давалі па 25 таблетак на дзень»

На наступны дзень Генадзя Забару накіравалі ў 6-ю лякарню, цалкам пераабсталяваную пад хворых на COVID-19. І там ён апынуўся ўжо ў палаце з усімі каранавіруснымі.

Гэта таксама было кардыялягічнае аддзяленьне, перапрафіляванае пад каранавірус. У Забары дыягнаставалі двухбаковую пнэўманію і COVID-19. Спачатку ў палаце на пяць чалавек было чацьвёра хворых, потым трое.

«Шчыра кажучы, стаўленьне лекараў да нас, каранавірусных, было вельмі грэблівае. Зразумела, што мэдыкі баяліся знаходзіцца ў палаце з хворымі, асьцерагаліся заразіцца самі. Абход доўжыўся некалькі сэкундаў: калі спрабуеш задаць пытаньне, яны пачынаюць злавацца. Мне давалі па 25 таблетак на дзень! Я запытаўся: „Патлумачце, навошта?“, але адказу не было», — расказвае спадар Забара.

Калі Генадзю Іванавічу стала зусім кепска, паднялася тэмпэратура, ягоны сын Павал дайшоў да галоўнага доктара лякарні, і на наступны дзень да бацькі прыйшоў цэлы кансыліюм: прафэсар, дацэнт, загадчык аддзяленьня і палатны доктар.

«Паслухалі мяне, паківалі і пайшлі. Колькасьць прэпаратаў ня зьменшылася. Я ня вытрымаў і сваёй маладой доктарцы сказаў, што нельга прызначаць больш як па чатыры прэпараты. Яна на мяне моцна пакрыўдзілася: маўляў, „кансыліюм прызначыў“. Праўда, на наступны дзень раніцай ужо далі 6 таблетак замест 11. У абед — 2, увечары — 6.

Я ні на кога зла не трымаю. Так не пашанцавала сёлета мне: паўтара месяца правёў у шпіталях. Затое пабачыў розных дактароў: і прафэсійна непрыдатных, і супэрпрафэсіяналаў», — кажа спадар Забара.

«Спадзяюся, плязма дапамагла іншаму чалавеку»

Нягледзячы на цэлы «букет» захворваньняў — бранхіяльную астму, эмфізэму лёгкіх, праблемы з сэрцам — да апарата штучнай вэнтыляцыі лёгкіх справа не дайшла. Сын Павал і ягоныя сябры праз фэйсбук шукалі для Генадзя Іванавіча плязму. Аднак у бацькі моцна ўпаў гемаглябін. Хацелі пераліваць кроў. Але раптоўна зноў паднялася тэмпэратура — да 39,5.

«Пры такой высокай тэмпэратуры нельга было пераліваць ні кроў, ні плязму. А тады плязму, якая падыходзіла пад маю групу крыві, для мяне ўжо знайшлі. А калі тэмпэратура ўпала, не было ўжо плязмы для мяне. Спадзяюся, яна дапамагла іншаму чалавеку», — расказаў Генадзь Іванавіч.

Ён мяркуе, што пераадолець цяжкую пнэўманію і каранавірус дапамагла прафэсія — ён клярнэтыст, духавік. Бранхіяльную астму ў музыкі знайшлі ў 62 гады.

«Я тады абурыўся: як такое можа быць? Я ж духавік!» Мне адказалі, што, калі б я ня граў на духавым інструмэнце, астму ў мяне знайшлі б гадоў на 40 раней", — згадвае музыка.

Пасьля выпіскі на ўсялякі выпадак Генадзь Іванавіч ізаляваўся ад сям’і — зьехаў на лецішча. Ніхто зь сямейнікаў больш не захварэў. Хоць усім ягоным сваякам адмовілі ў правядзеньні тэстаў на COVІD-19.

Цяпер клярнэтыст вельмі перажывае за сваіх калег-музыкаў: у некаторых калектывах Белдзяржфілярмоніі таксама выявілі заражаных каранавірусам.

Што трэба ведаць пра новы каранавірус, які выклікае COVID-19

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​


Найважнейшыя пытаньні і адказы пра каранавірус

Як зьмяняецца колькасьць хворых у Беларусі і суседніх краінах. Толькі графікі

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG