Колькасьць выпадкаў заражэньняў каранавірусам у Расіі за мінулыя суткі вырасла на 11 656. Пра гэта паведаміў апэратыўны штаб. Гэта самая вялікая колькасьць новых выпадкаў інфікаваньня за суткі за ўвесь час пандэміі.
Каранавірус у Беларусі і ў сьвеце. Як разьвіваюцца падзеі >>
На сёньня ў краіне налічваецца 221 344 інфікаваныя. Такім чынам, Расея абышла Вялікую Брытанію і Італію і паднялася на трэцяе месца ў сьвеце ў колькасьці пацьверджаных выпадкаў заражэньня каранавірусам.
Новыя выпадкі заражэньня рэгістраваліся ў 84 рэгіёнах, больш за ўсё ў Маскве — 6169. Гэта таксама самы высокі паказьнік.
Агульная колькасьць памерлых пацыентаў дасягнула 2009. За апошнія суткі памерлі 94 чалавекі.
Колькасьць тых, хто ачуняў, пасьля перанесенай каранавіруснай інфэкцыі вырасла амаль да 40 тысяч. Толькі ў Маскве за апошнія суткі паправіліся больш за 4 тысячы пацыентаў. Гэта найбольшы паказьнік з пачатку эпідэміі.
Прэзыдэнт Расеі Ўладзімір Пуцін сёньня правядзе нараду аб сытуацыі з каранавірусам, на якой будзе абмяркоўвацца магчымасьць падаўжэньня рэжыму непрацоўных дзён у Расеі.
Першы раз Пуцін абвясьціў непрацоўнымі дні з 30 сакавіка па 5 красавіка для зьніжэньня распаўсюджваньня каранавіруснай інфэкцыі. Затым ён падаўжаў іх да 30 красавіка і да 11 траўня. У пачатку траўня Пуцін заявіў пра неабходнасьць пачаць падрыхтоўку да паэтапнага зьняцьця абмежаваньняў.
Кіраўнік Расспажыўнагляду Ганна Папова прапанавала рабіць гэта ў тры этапы, кожны зь якіх прадугледжвае паступовае пашырэньне кантактаў паміж людзьмі.
Пры гэтым рашэньні пра паслабленьне абмежаваньняў прапанавана прымаць губэрнатарам расейскіх рэгіёнаў. У Маскве і ў Падмаскоўі абмежаваньні, уведзеныя з прычыны эпідэміі, ужо працягнулі да 31 траўня.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
