Беларускія межы застаюцца фармальна адкрытымі, але выехаць з краіны няма магчымасьці.
У сувязі з працягам пандэміі COVID-19 суседзі Беларусі Ўкраіна і Літва працягнулі дзеяньне карантынных захадаў, у тым ліку забарону ўезду іншаземцаў (за выключэньнем кіроўцаў грузавога транспарту, дыпляматаў і некаторых іншых катэгорый грамадзян).
- Расея закрыла межы на пэрыяд з 18 сакавіка па 30 красавіка, забарону могуць і падоўжыць.
- Польшча — да 3 траўня.
- Украінская мяжа закрытая з 17 сакавіка да 11 траўня.
- У Літву іншаземцы таксама ня змогуць заехаць сама меней да 11 траўня.
- У Латвію — да 12 траўня.
Інфармацыя сабраная агенцтвам БелаПАН з сайтаў дзяржаўных органаў гэтых краінаў.
У сувязі з карантынам дыпляматычныя прадстаўніцтвы Польшчы, Літвы (а таксама візавыя цэнтры гэтых краінаў) і Латвіі спынілі прыём дакумэнтаў на візы. Візавыя цэнтры Літвы ў Менску і Горадні прымаюць дакумэнты ў кіроўцаў, якія робяць грузаперавозкі.
Беларусь сваіх межаў не закрывала, аднак тыя, хто ўяжджае ў краіну, абавязаны два тыдні знаходзіцца на самаізаляцыі.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў