Лінкі ўнівэрсальнага доступу

Улады Докшыцаў закрылі школы, вучняў перавялі на дыстанцыйнае навучаньне


Ілюстрацыйнае фота. Школа ў вёсцы Гліннае Докшыцкага раёну, дзе ў адной з супрацоўніц знайшлі каранавірус

Ад 20 красавіка толькі вясковыя школы Докшыцкага раёну аднавілі працу. У школах гарадоў Докшыцы і Бягомль вучні перайшлі на дыстанцыйнае навучаньне.

Як патлумачылі Свабодзе ў райвыканкаме, часова закрыць школы пастанавілі ў раённым штабе па барацьбе з распаўсюдам каранавіруснай інфэкцыі. Цяпер заняткі праходзяць дыстанцыйна ў гарадзкіх школах Докшыцаў і Бягомля. Вучні і настаўнікі выкарыстоўваюць электронныя журналы і дзёньнікі.

Калі вучням дазволяць пайсьці ў школу, невядома. Прынамсі гэты тыдзень навучаньне будзе дыстанцыйнае.

У вясковых школах Докшыцкага раёну заняткі аднавіліся пасьля падоўжаных вакацый, як і ва ўсёй Беларусі. Цяпер школы наведвае каля 40% вучняў, паведамілі Свабодзе ў аддзеле адукацыі райвыканкаму.

«Спадзяёмся, іх будзе станавіцца болей. На другі дзень на заняткі прыйшло больш вучняў», — сказала начальніца аддзелу адукацыі Аксана Гушчык.

Аднак бацькі і настаўнікі некаторых вясковых школ паведамілі Свабодзе, што на заняткі ў першыя дні прыйшло ўсяго па некалькі чалавек. А ў некаторых клясах увогуле не было ніводнага вучня.

Начальніца аддзелу адукацыі пацьвердзіла, што перавод гарадзкіх школ на дыстанцыйнае навучаньне зьвязаны са складанай эпідэміялягічнай абстаноўкай.

У беларускіх установах адукацыі не абвяшчалі карантыну ў сувязі з пандэміяй каранавірусу. Але двойчы падаўжалі школьныя вакацыі: тыя пачаліся 30 сакавіка і плянаваліся да 4 красавіка, але былі працягнутыя спачатку да 11-га, затым да 18-га ўключна.

17 красавіка ў час візыту ў Лідзкі раён Лукашэнка заявіў, што «трэба акуратна глядзець за людзьмі і наконт адукацыі, школаў і іншага, трэба пачынаць вучыцца». Празь некалькі гадзін пасьля той заявы міністар адукацыі абвясьціў, што беларускія школьнікі пачнуць займацца 20 красавіка.

У Міністэрстве адукацыі прапанавалі «пісаць заявы» бацькам, якія ня хочуць выпраўляць дзяцей у школы ў час пандэміі каранавірусу.

У Докшыцах Віцебскай вобласьці адбылася ўспышка каранавірусу. Паводле афіцыйнай інфармацыі, на 17 красавіка ў Докшыцкім раёне зафіксаваныя 72 выпадкі каранавірусу. Няпрофільныя аддзяленьні мясцовай лякарні перавялі пад прыём пацыентаў з пнэўманіяй.

Улады таксама паведамлялі, як у раёне змагаюцца з каранавірусам. Тут забароненыя ўсе масавыя мерапрыемствы, закрытыя рынкі, лазьні, водна-аздараўленчы цэнтар. Пры гэтым большасьць дзяржаўных арганізацый і прадпрыемстваў працягваюць працаваць, нягледзячы на тое, што выпадкі каранавірусу былі ўжо зафіксаваныя шмат дзе.

Што трэба ведаць пра новы каранавірус, які выклікае COVID-19

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​


Найважнейшыя пытаньні і адказы пра каранавірус

Як зьмяняецца колькасьць хворых у Беларусі і суседніх краінах. Толькі графікі

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG