Кітайскія ўлады «панясуць адказнасьць», калі высьветліцца, што «сьвядома» хавалі дадзеныя аб каранавірусе, заявіў прэзыдэнт ЗША Дональд Трамп.
Каранавірус у Беларусі і ў сьвеце. Як разьвіваюцца падзеі >>
Ён перакананы, што небясьпечны вірус можна было спыніць у Кітаі яшчэ да пачатку пандэміі, але цяпер праз гэта пакутуе ўвесь сьвет.
«Усё залежыць ад таго, ці было тое, што здарылася з каранавірусам, памылкай, якая выйшла з-пад кантролю, або гэта было зроблена сьвядома», — спасылаецца Deutsche Welle на Дональда Трампа.
Адміністрацыя амэрыканскага прэзыдэнта не выключае вэрсію, што новы вірус мог быць выпадкова распаўсюджаны з лябараторыі ва Ўхані. Аднак кітайскія ўлады такую магчымасьць адмаўляюць, сьцьвярджаючы, што ў яе няма навуковай асновы.
Акрамя таго, Дональд Трамп ставіць пад сумнеў афіцыйную статыстыку сьмяротнасці ў КНР, лічачы яе істотна заніжанай. Пасьля пералікаў колькасьці ахвяраў ва Ўхані гэтая колькасьць была павялічаная на 50%, аднак, на думку экспэртаў, і новая лічба не адпавядае рэальнасьці.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
