Прэзыдэнт Таджыкістану Эмамалі Рахмон правёў пазачарговае апэратыўнае пасяджэньне ўраду, прысьвечанае пашырэньню каранавірусу. Сярод захадаў, якія абмяркоўваліся на пасяджэньні, — падтрымка ўразьлівых групаў насельніцтва, падатковыя паслабленьні і льготныя крэдыты для малога і сярэдняга бізнэсу, рэгуляваньне цэн на харчовыя тавары, піша «Азія-Плюс».
Рахмон таксама даручыў арганізаваць у краіне «двухгадовую нарыхтоўку харчовых прадуктаў для кожнай сям’і», стварыць цяпліцы на прэзыдэнцкіх землях і прысядзібных участках і прыняць усе неабходныя санітарна-гігіенічныя захады для прадухіленьня заражэньня насельніцтва.
Прэзыдэнт заклікаў міністэрствы павялічыць вытворчасьць і нарыхтоўку прадукцыі першай неабходнасьці, асабліва мукі, алею і рысу.
Акрамя таго, кіраўнікам абласьцей, гарадоў і раёнаў прэзыдэнт даручыў правесьці тлумачальную працу з насельніцтвам аб своечасовым пасеве культур.
Афіцыйна ў Таджыкістане не зафіксавана ніводнага выпадку заражэньня каранавірусам.
