Лінкі ўнівэрсальнага доступу

У кожную паштовую скрыню. У Менску зьбіраюць грошы на рассылку брашураў пра каранавірус


Ілюстрацыйнае фота

На сайце Molamola.by фатограф і рэжысэр Алесь Меліхавец ініцыяваў збор грошай на рассылку інфармацыйных брашураў пра сытуацыю з пандэміяй каранавірусу.

Каб разаслаць брашуры, ён хоча сабраць 86 тысяч рублёў. Інфармацыю перадусім адрасаваць пэнсіянэрам і тым, хто ня можа атрымаць зьвесткі з інтэрнэту.

У брашуры раяць заставацца дома, мыць рукі, зьвяртацца па мэдычную дапамогу ў выпадку зьяўленьня сымптомаў COVID-19. Таксама ў праекце брашуры пералічваюцца сымптомы і даецца статыстыка распаўсюду каранавірусу (Меліхавец заявіў Свабодзе, што статыстыку будуць абнаўляць з кожным накладам улётак).

Разьлік такі: пачаць трэба зь Менску, разаслаць брашуры па кожнай з 823 тысяч паштовых скрыняў гораду, разьвесіць 14 тысяч абвестак па пад’ездах усіх 7 тысяч шматкватэрных дамоў сталіцы. Пасьля, калі менская кампанія будзе пасьпяховай, ён зьбіраецца расклеіць абвесткі ва ўсіх раённых цэнтрах Беларусі.

Аўтар ідэі адзначае, што калі зьбярэцца меншая сума, то рассылка будзе зробленая на меншую колькасьць паштовых скрыняў і пад’ездаў. Але чым большымі блёкамі будзе ісьці распаўсюд, тым таньнейшым будзе распаўсюд кожнай улёткі.

Пра жыхароў вёсак, кажа Меліхавец, ён таксама думаў, але пачаць вырашыў менавіта зь Менску, дзе найбольш хворых.

Чаму таго, што кажуць на тэлевізіі і радыё недастаткова? Меліхавец кажа Свабодзе, што «тыя ракурсы, зь якіх апошні час падаецца інфармацыя ў дзяржаўных СМІ можна назваць дзіўнымі».

Адэкватная інфармацыя, якая даводзіцца сваечасова, можа выратаваць шмат жыцьцяў, адзначае ён. «Народныя» сродкі і парады Лукашэнкі кшталту лазьні і працы ў полі могуць зрабіць імунітэт мацнейшым, але «зараз час не прафіляктыкі, а актыўных дзеяньняў у барацьбе зь вірусам».

Ці ня позна рассылаць парады зараз, калі вірус ужо шырока і хутка распаўсюджваецца па краіне?

«Я лічу, што зараз — самы час, — адказвае Меліхавец. — Піку эпідэміі ў Беларусі яшчэ толькі чакаюць і, магчыма, менавіта зараз такія захады, як інфармаваньне насельніцтва, могуць даць найбольшую карысьць, прадухіліць распаўсюд эпідэміі. У кантэксьце кампаніі па паштовай рассылцы, канешне, ідэальна было б, калі б сродкі былі на масавы распаўсюд, на ўсе кватэры, каб інфармацыя дайшла да кожнага».

Што трэба ведаць пра новы каранавірус з Кітаю

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​


Найважнейшыя пытаньні і адказы пра каранавірус

Як зьмяняецца колькасьць хворых у Беларусі і суседніх краінах. Толькі графікі

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG