Ва Украіне набліжаецца да дзьвюх тысяч лік лябараторна пацьверджаных выпадкаў захворваньня каранавірусам. 57 чалавек ад пачатку пандэміі памерлі, прычым першая сьмерць хворага на COVID-19 была зафіксаваная яшчэ 25 сакавіка. Але з таго часу прайшлі цэлыя два тыдні, і толькі цяпер Міністэрства аховы здароўя Ўкраіны апублікавала рэкамэндацыі, як хаваць хворых з COVID-19.
Як вынікае з прамовы намесьніка міністра аховы здароўя Ўкраіны, галоўнага санітарнага доктара Віктара Ляшко:
- праводзіць крэмацыю целаў памерлых ад каранавірусу ва ўкраінскім Міністэрстве аховы здароўя не патрабуюць;
- але пры гэтым пахаваньне ці крэмацыя мусяць праходзіць у шчыльна зачыненай труне;
- сваякам і прысутным на пахаваньні забаронена цалаваць цела памерлага;
- на рытуальным абрадзе могуць прысутнічаць ня больш за 10 чалавек;
- пры гэтым прысутныя павінны захоўваць бясьпечную дыстанцыю ў 1,5 мэтра;
- цела перад пахаваньнем павінны апрацаваць дэзынфэкцыйным растворам і зьмясьціць у гермэтычны пакет-мех;
«Галоўная мэта прапісаных захадаў — пазьбегнуць кантакту зь целам хворага, паколькі менавіта праз кантакт, менавіта праз наяўнасьць біялягічных вадкасьцяў, якія выдзяляюцца зь цела памерлага, мы можам перадаць узбуджальніка каранавіруснай хваробы», — растлумачыў Ляшко.
За парушэньне гэтых санітарных нормаў паліцыя ўжо распачала крымінальную справу ў дачыненьні мэдыкаў у Херсонскай вобласьці. Яны выдалі цела жанчыны, якая памерла ад каранавірусу, для пахаваньня, не дачакаўшыся вынікаў тэстаў. У выніку аднавяскоўцы, якія былі на могілках, пра яе дыягназ даведаліся ўжо пасьля разьвітаньня.
Новыя правілы пахаваньня павінны, як разьлічваюць у Міністэрстве аховы здароўя Ўкраіны, выключыць такую сытуацыю, якая адбылася ў бальніцы Цярнопалю, дзе ад каранавірусу памёр 58-гадовы Павел Баднарчук зь сяла Кавалёўка. Яго родныя расказалі: калі прыехалі забіраць цела — лекары проста вынесьлі труп у калідор шпіталя ў мяху, які не закрываўся на замок, зачынілі дзьверы і пайшлі, не прапанаваўшы ніякай дапамогі. Сваякам у выніку давялося цягнуць цела па зямлі.
«Гэтым займалася мая сястра. Мех парваўся, і на ім разыходзіўся замок, уяўляеце? — расказала дачка Паўла Ганна Палішчук. — Бацька важыў дзесьці 100 кіляграмаў, яны гэты мех цягнулі па зямлі, яна і муж зь ёй. Яна кажа: «Мы ад страху не разумелі, мы галаву нясём ці ногі. Такая была паніка».
«Яна тады патэлефанавала, па-мойму, галоўнаму доктару, і спытала, што яны павінны рабіць зь целам. А ёй сказалі, што ёсьць усяго тры мэдсястры ў шпіталі, і ніхто сябе ня будзе падстаўляць небясьпецы», — заявіла Ганна.
Паводле дачкі, людзі ў вёсцы — таксама ад страху перад каранавірусам — адмовіліся капаць магілу Паўлу, хоць звычайна менавіта аднавяскоўцы хаваюць сваіх землякоў. Каб пахаваць Бандарчука, улады былі вымушаныя наняць трактар, а апускалі цела ў магілу мэр райцэнтру, яго намесьнік, кіраўнік сельсавету і зяць памерлага.
«Труна была засыпана хлёркай, зачыненая. Перад тым, як труну браць, ручкі працерлі растворам, — расказваў аб тым пахаваньні Андрэй Старых, мэр гораду Манастырску. — Мы памаліліся, апусьцілі ў яму, кінулі ў яму хлёрку, засыпалі зямлёй».
«Мы паглядзелі, што нікога няма ахвочых хаваць. Ну дык што, пакінуць чалавека не па-хрысьціянску непахаваным, хай труна ляжыць на зямлі на могілках?» — зазначыў ён.
Мэр Манастырыску, дачка памерлага і яе дзеці пасьля пахаваньня Паўла Бандарчука таксама захварэлі на каранавірус. Але дзе менавіта яны заразіліся, дакладна сказаць нельга.
