Лінкі ўнівэрсальнага доступу

Сьледчы камітэт прапанаваў канфіскоўваць крыптавалюту і аслабіць пакараньне за «лайкі» пад порна


Іван Наскевіч, старшыня Сьледчага камітэту Беларусі

Старшыня Сьледачага камітэту Беларусі Іван Наскевіч у інтэрвію тэлеканалу СТВ расказаў аб прапановах сьледчых у зьменах заканадаўства.

Паводле Наскевіча, у 2019 годзе ў Беларусі зафіксавалі ўдвая больш «кібэрзлачынстваў», чым годам раней. З 91,5 тысячы ўсіх зафіксаваных злачынстваў у краіне 11,5 тысячы былі зьвязаныя з высокімі тэхналёгіямі.

Наскевіч зьвязаў гэта з тым, што грамадзтва ўсё больш адыходзіць ад наяўных грошай і пераходзіць на разьлікі праз інтэрнэт, таму і злачынствы ў сфэры інтэрнэт-плацяжоў атрымліваюць большае распаўсюджаньне.

«Банальныя крадзяжы з банкаўскіх картак», адзначыў Наскевіч, раскрываюцца даволі лёгка, і ў суд ідзе вялікі адсотак выпадкаў крадзяжоў картак, забытых у банкаматах або з кішэні пацярпелага. Але іншыя злачынствы выклікаюць цяжкасьці — шмат якія з кібэрзлачынстваў інтэрнацыянальныя.

Што прапануе Сьледчы камітэт

Наскевіч агучыў у інтэрвію шэраг прапановаў аб зьменах у заканадаўстве, у прыватнасьці ў Крымінальны і Адміністрацыйны кодэксы.

  • Увесьці адказнасьць за незаконнае абарачэньне рэквізытаў банкаўскіх картак. У тым ліку за так званы «вішынг» — выпадкі, калі ў чалавека выпытваюць рэквізыты картак праз тэлефон ад імя банку. Гэта хочуць кваліфікаваць як «незаконнае абарачэньне плацежных інструмэнтаў» (арт. 222 КК).
  • Не крымінальны, а адміністрацыйны артыкул за падабайкі пад порна. Як і раней, СК прапануе дэкрыміналізаваць ч. 1 арт.343 КК для выпадкаў, калі чалавек, напрыклад, паставіў падабайку пад порнаролікам або зрабіў рэпост порна, ня ведаўшы, што такім чынам робіць крымінальнае злачынства. Каб так рабіць, трэба ўнесьці адпаведнае парушэньне ў КаАП. А паводле КК караць пры паўторным «незаконным лайку».
  • Канфіскоўваць крыптавалюту. Пакуль у выпадках, калі крыптавалюта зьяўляецца прадметам злачынства, няма мэханізму рэгуляваньня канфіскацыі.
  • Пры ператрусах не канфіскоўваць тэхнікі. Толькі капіяваць з электронных носьбітаў неабходную інфармацыю падчас ператрусаў, агляду месца злачынства і іншых працэсуальных дзеяньнях, каб не паралізоўваць дзейнасьць суб’ектаў гаспадараньня. Гэта магчыма будзе рабіць на месцы, не канфіскаваўшы кампутары або тэлефоны.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG