Лінкі ўнівэрсальнага доступу

МЗС Беларусі: у паляпшэньні стасункаў з ЗША «няма нічога антырасейскага»


Аляксандар Лукашэнка і дзяржаўны сакратар ЗША Майкл Пампэо на сустрэчы ў Менску, 1 ютага

У час выступу ў Палаце прадстаўнікоў намесьнік міністра замежных справаў Беларусі Алег Краўчанка расказаў пра адносіны Беларусі і ЗША, піша БелаПАН.

Намесьнік міністра замежных спраў Алег Краўчанка, архіўнае фота
Намесьнік міністра замежных спраў Алег Краўчанка, архіўнае фота

Паводле Алега Краўчанкі, цяперашні этап дачыненьняў са Злучанымі Штатамі «не зьяўляецца нечым экстраардынарным і не выходзіць за межы аднаўленьня стасункаў, якія надта даўно былі ў надзвычай кепскім стане».

Гэты этап ён назваў «толькі вяртаньнем да нармальнага стану справаў» і адзначыў, што адносіны яшчэ не вярнуліся на ўзровень, які быў да канфлікту 2007–2008 гадоў. А на тле ранейшых цяжкасьцяў цяперашні прагрэс, адзначыў Краўчанка, могуць «успрымацца як тыя, што разьвіваюцца ледзь ня бурна».

«Я ня згодны з тымі, хто лічыць, што паляпшэньне адносін Беларусі з ЗША адбылося з прычыны падзей ва Ўкраіне ці пагаршэньня амэрыканска-расейскіх стасункаў, — сказаў намесьнік міністра. — Працэс нармалізацыі пачаўся асьцярожна, павольна і няўпэўнена ў 2012-м, часткова нават у 2011 годзе. Разьвіцьцё гэтага працэсу абумоўлена палітычнай воляй і намаганьнямі абодвух бакоў».

Але яшчэ ў жніўні 2011 году ЗША пашырылі санкцыі супраць беларускіх уладаў. Толькі ў 2015 годзе ўлады ЗША прыпынілі дзеяньне эканамічных санкцый супраць Беларусі. У далейшым дзеяньне санкцый прыпынялася кожныя паўгода, а канчаткова не скасавана дагэтуль.

«Амэрыканцы не прапануюць павярнуцца сьпінай да Расеі»

Паводле Краўчанкі, ён «катэгарычна супраць проціпастаўленьня» паляпшэньняў стасункаў Беларусі і ЗША «саюзьніцкім адносінам» Беларусі і Расеі.

«У іх няма і ня можа быць нічога антырасейскага, — запэўніваў ён пра стасункі Беларусі і ЗША. — Па-першае таму, што мы ня маем такіх плянаў, а па-другое таму, што амэрыканцы ад нас ня толькі не патрабуюць, але і не прапануюць нам павярнуцца сьпінай да Расеі».

Ён згадаў, што ў часы самых складаных адносін Беларусі і ЗША Штаты праводзілі «перазагрузку» стасункаў з Расеяй, і ў Беларусі гэта не выклікала «ні зайздрасьці, ні падазрэньняў»; Расею «не заклікалі пасварыцца з амэрыканцамі заадно з намі».

«Гістарычна ва ўмовах канфлікту паміж Захадам і Ўсходам мы нічога не набывалі, а толькі несьлі велізарныя страты, — дадаў намесьнік міністра. — Таму мы ня можам кіравацца меркаваньнямі падліваньня алею ў агонь супярэчнасьцяў. Гэта супярэчыць нашым уласным інтарэсам».

Як разьвіваліся адносіны Беларусі і ЗША. Галоўнае

  • ЗША прызналі Беларусь у 1992 годзе.
  • У 1994 годзе ЗША, разам зь Вялікай Брытаніяй і Расеяй, падпісалі Будапэшцкі мэмарандум аб гарантыях бясьпекі для Беларусі ў абмен на перадачу Беларусьсю ядзерных узбраеньняў Расеі.
  • Прэзыдэнт ЗША Біл Клінтан быў зь візытам у Беларусі ў 1994 годзе, падчас візыту ён наведваў Курапаты.

  • Кіраўнік Беларусі Аляксандар Лукашэнка ніводнага разу ня быў з афіцыйным візытам у ЗША.
  • Таваразварот гандлю паміж Беларусьсю і ЗША ў 2018 годзе склаў 711 мільёнаў даляраў.
  • Аляксандар Лукашэнка неаднойчы казаў, што без ЗША канфлікт ва Ўкраіне ня можа быць вырашаны.
  • У 2016 годзе кіраўнік Беларусі заяўляў, што прэзыдэнцкія выбары ў ЗША выйграе Дональд Трамп.
Error rendering VK.

  • У 2010-я гады Беларусь была адным са шляхоў невайсковага транзыту грузаў для амэрыканскай вайсковай групоўкі ў Аўганістане.
  • У ЗША ў 2004 годзе быў прыняты закон «Акт аб дэмакратыі для Беларусі», які абмяжоўвае гандаль паміж дзьвюма краінамі і забараняе ўраду ЗША галасаваць у міжнародных фінансавых арганізацыях за выдзяленьне Беларусі крэдытаў.
  • З 2006 году адносна беларускіх чыноўнікаў дзейнічаюць амэрыканскія візавыя санкцыі.
  • У 2007 годзе ЗША ўвялі эканамічныя санкцыі адносна прадпрыемстваў беларускага канцэрну «Белнафтахім».
  • У 2008 годзе Менск запатрабаваў ад‘езду з краіны пасла ЗША Карэн Ст’юарт.
  • Адначасова штат амбасады быў скарочаны з 35 супрацоўнікаў да пяці.
    З таго часу і дагэтуль ЗША ў Беларусі і Беларусь у ЗША прадстаўленыя на ўзроўні часовых павераных.

11 год без амбасадараў. Як мяняліся дыпляматычныя стасункі паміж ЗША і Беларусьсю

  • У 2015 годзе ЗША віталі вызваленьне палітвязьняў у Беларусі і высілкі Менску па спрыяньні ўрэгуляваньню канфлікту на ўсходзе Ўкраіны.
  • У 2015 годзе ўлады ЗША прыпынілі дзеяньне эканамічных санкцый адносна Беларусі. У далейшым дзеяньне санкцый прыпынялася кожныя паўгода.
  • У 2019 годзе Менск і Вашынгтон дамовіліся аднавіць паўнавартасныя дыпляматычныя адносіны.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG