Лінкі ўнівэрсальнага доступу

Інфармацыя пра Беларусь як самую пітушчую краіну сьвету — фэйк


Уваход у краму з алькаголем у менскім гандлёвым цэнтры

25 лютага шэраг СМІ апублікавалі навіну пра тое, што Беларусь зноў узначаліла рэйтынг самых пітушчых краінаў сьвету. Тлумачым, чаму гэта ня так.

14,4 літра сьпірту на чалавека штогод выпіваюць у Беларусі — такую навіну апублікавалі шэраг беларускіх СМІ са спасылкай на рэйтынг World Population Review.

Але, як высьветліла Свабода, — гэта фэйк. Насамрэч у рэйтынгу проста ўзялі дадзеныя з агляду Ўсясьветнай арганізацыі здароўя за 2014 год.

Насамрэч у Эўропе Беларусь займае 23 месца па спажываньні алькаголю. У такім жа ўсясьветным рэйтынгу Беларусь на 27 месцы.

Пра гэта Свабодзе сказаў прадстаўнік Усясьветнай арганізацыі аховы здароўя ў Беларусі Батыр Бердыклычаў:

«Мы зараз разабраліся, яны проста не праверылі лічбы і зрабілі спасылку на справаздачу 2014 году, якая грунтуецца на дадзеных 2010 году, — сказаў Свабодзе Батыр Бердыклычаў. — 11,2 літра спажываньня сьпірту на чалавека — такія дадзеныя па глябальнай справаздачы УАЗ за 2018 год. І калі ў 2014 годзе былі спрэчкі з боку Мінздароўя, то цяпер у нас поўная згода па мэтадалёгіі і выніках».

У 2018 годзе, па статыстыцы УАЗ, самай пітушчай была Малдова (15,2 літра сьпірту на чалавека на год), Літва (15 літраў), Чэхія (14,4 літра), Нямеччына (13,4 літра), Нігерыя (13,4 літра).

Больш, чым у Беларусі, пілі ў Латвіі (12,9 літра), Расеі (11,7 літра), Польшчы (11,6 літра).

Па статыстыцы Белстату, спажываньне алькаголю ў Беларусі — 11,5 літра сьпірту на кожнага жыхара, старэйшага за 15 гадоў. Найбольш спажываюць піва, гарэлку і пладовае віно. Найменш — каньяк і брэндзі.

Паводле УАЗ, спажываньне больш як 8 літраў сьпірту на год нясе ня толькі пагрозу жыцьцю, але і вядзе да дэградацыі грамадзтва.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG