Адзін з самых старажытных гарадоў сьвету Хасанкейф на рацэ Тыгр у Турэччыне ў хуткім часе зьнікне — тут завяршаецца будаўніцтва новай гідраэлектрастанцыі. Разам з горадам будуць затопленыя каля чатырох тысяч пячор і бліжэйшыя вёскі, усяго 199 паселішчаў.
Гэты рэгіён населены пераважна курдамі.
Вадасховішча запоўніцца ўжо ў сакавіку. Плянуецца, што ГЭС будзе вырабляць 4% ад усёй электраэнэргіі ў Турэччыне. Пасьля акцый пратэсту ад удзелу ў праекце адмовіліся эўрапейскія інвэстары.
Як паведамляе Euronews, большасць мясцовых жыхароў ужо пакінулі свае дамы. Але нягледзячы на абяцаньні турэцкіх уладаў, некаторыя так і не трапілі ў сьпісы перасяленцаў і да гэтага часу не ведаюць, дзе будуць жыць.
Сотні тысяч турыстаў штогод прыяжджалі паглядзець на археалягічныя помнікі Хасанкейфу. З усёй гістарычнай спадчыны ўлады перамясьцілі толькі восем аб’ектаў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў