Лінкі ўнівэрсальнага доступу

Задушэньне, электрашокер, пагрозы згвалтаваньня. Сьведка Яговы ў Расеі заявіў пра катаваньні пасьля затрыманьня


Ілюстрацыйнае фота. Абрад хрышчэньня Сьведак Яговы ў Менску.
Ілюстрацыйнае фота. Абрад хрышчэньня Сьведак Яговы ў Менску.

10 лютага ў Чыце і яе ваколіцах прайшлі масавыя ператрусы ў дамах пасьлядоўнікаў Сьведак Яговы. Трох чалавек затрымалі адразу, а да чацьвёртага — Вадзіма Куцэнкі — прыйшлі ноччу.

Куцэнку адвезьлі ў лес і катавалі электрашокерам, каб выбіць прызнальныя паказаньні, распавёў выданьню The Insider адвакат Куцэнкі Артур Ганін.

«Ужывалі прыём задушэньня і ў гэты момант пускалі ток электрашокерам. Ток пускалі ў ногі і жывот. Білі па твары і шыйным аддзеле хрыбетніка. У Вадзіма Аляксандравіча траўма шыйнага аддзелу, ён аб гэтым ім адразу сказаў і папрасіў туды ня біць», — расказаў Ганін.

Адвакат дадаў, што катаваньні суправаджаліся пагрозамі: «пагражалі, што зробяць усё магчымае, каб яго на зоне «апусьцілі».

Вадзім Куцэнка, паводле словаў адваката, адмовіўся ўзяць віну на сябе. Калі затрыманага ўсё ж прывезьлі да сьледчай, ён паведаміў аб катаваньнях, але сьледчая не адрэагавала і адправіла яго ў ІЧУ ў суправаджэньні гэтых жа супрацоўнікаў.

Адвакат дадаў, што на іншых затрыманых вернікаў ціснулі.

«Аднаму сказалі так: «Тваю жонку будуць гвалтаваць, а мы ўсё гэта запішам на відэа і пакажам табе», — адзначыў Ганін.

10 лютага пасьлядоўнікі Сьведак Яговы паведамілі пра масавыя ператрусы ў сваіх дамах. Сьледчыя дзеяньні праводзіліся ў Чыце, гарадах Шылко і Хілке, пасёлках Карымскае, Першамайскі, Курорт-Дарасун.

Сьледчае ўпраўленьне СК РФ па Забайкаллі паведаміла, што ператрусы праводзіліся ў рамках справы аб арганізацыі дзейнасьці экстрэмісцкай арганізацыі. Паводле дадзеных сьледзтва, сьведкі Яговы арганізоўвалі сход, рэлігійныя выступы, праводзілі публічныя пропаведзі, зьбіралі ахвяраваньні.

У 2017 годзе Вярхоўны суд Расеі прызнаў Сьведак Яговы экстрэмісцкай арганізацыяй і забараніў яе дзейнасьць у Расні. 7 лютага 2020 году «Росфинмониторинг» уключыў больш за 200 пасьлядоўнікаў гэтага рэлігійнага плыні ў сьпіс арганізацый і фізычных асоб, якія маюць дачыненьне да экстрэмісцкай дзейнасьці або тэрарызму.

У што вераць Сьведкі Яговы

  1. Бог. Сьведкі Яговы вераць у адзінага праўдзівага і ўсёмагутнага Бога, чыё імя — Ягова.
  2. Біблія. Сьведкі Яговы вераць, што Біблія — гэта слова Бога. Яны засноўваюць усе свае вучэньні на 66 кананічных кнігах Бібліі. Пры гэтым яны прызнаюць, што частка Бібліі напісана вобразнай мовай і не павінна разумецца літаральна.
  3. Ісус Хрыстос. Яны вераць у тое, што Ісус Хрыстос — гэта Збаўца і Сын Бога, але лічаць, што вучэньне пра Тройцу не заснаванае на Сьвятым Пісаньні.
  4. Царства Бога. Яны вераць у тое, што адзіная надзея чалавецтва — Царства Бога як нябесны ўрад, які ў хуткім часе зьнішчыць сучасны парадак у сьвеце, у тым ліку ўсе чалавечыя ўрады, і створыць новы парадак, у якім будуць жыць толькі праведныя людзі.
  5. Збавеньне. Пазбаўленьне ад граху магчымае дзякуючы ахвяры Ісуса Хрыста. Для гэтага трэба верыць у Хрыста і хрысьціцца. Аднак збавеньне немагчыма заслужыць, яго можна атрымаць толькі дзякуючы Божай дабрыні.
  6. Нябёсы. Адносна невялікая колькасьць людзей, 144 000, уваскрэснуць для жыцьця нябеснага, каб кіраваць разам з Ісусам Хрыстом у Царстве Бога.
  7. Зямля. Сьведкі Яговы вераць, што Бог падорыць паслухмяным яму людзям дасканалае здароўе і вечнае жыцьцё ў раі на зямлі.
  8. Зло і пакуты. Паводле Сьведак Яговы, зло і пакуты зьявіліся, калі адзін з анёлаў паўстаў супраць Бога. Гэты былы анёл пасьля бунту быў названы Сатаной і Д’яблам. Ён спакусіў Адама і Еву, што мела для людзей жахлівыя наступствы.
  9. Сьмерць. Калі чалавек памірае, ён перастае існаваць. Бог не катуе людзей у пекле. Бог верне людзей да жыцьця праз уваскрашэньне. Тыя, хто пасьля ўваскрашэньня адмовіцца вучыцца Божым шляхам, будуць назаўжды зьнішчаныя.
  10. Сям’я. Сям’я разглядаецца як саюз аднаго мужчыны і адной жанчыны, а развод лічыцца дапушчальным толькі ў выпадку сэксуальнай здрады мужа ці жонкі.
  11. Пакланеньне Богу. Сьведкі Яговы не ўшаноўваюць крыж ды іншыя выявы. Сярод іх формаў пакланеньня Богу — малітва, чытаньне і вывучэньне Бібліі, дапамога бедным і пацярпелым ад стыхійных бедзтваў.
  12. Арганізацыя. Сьведкі Яговы аб’яднаныя ў сходы, кожны зь якіх мае раду старэйшын. Аднак старэйшыны не атрымліваюць платы і не зьяўляюцца духавенствам. Дзейнасьць падтрымліваецца добраахвотнымі ахвяраваньнямі, якія робяцца ананімна.
  13. Адзінства. Сьведкі Яговы дэкляруюць, што робяць усё магчымае, каб сярод іх не было сацыяльных, этнічных, расавых ці клясавых падзелаў.
  14. Паводзіны. Сьведкі Яговы кажуць пра павагу да законаў любой краіны, калі тыя не пярэчаць законам Бога. Сярод забароненых Богам рэчаў яны называюць пераліваньне крыві. Сьведкі Яговы імкнуцца да міру і ня ўдзельнічаюць у войнах.
  15. Адносіны зь іншымі. Сьведкі Яговы спрабуюцца заставацца нэўтральнымі ў палітычных пытаньнях.

Паводле афіцыйнага сайту Сьведак Яговы


Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG