Лінкі ўнівэрсальнага доступу

Супрацоўнікаў КДБ западозрылі ў зьбіцьці дырэктара гомельскай кавярні. Камітэт не камэнтуе

абноўлена

Кавярня «The Box 99»

Увечары 8 лютага каля гомельскай кавярні «The Box 99» двое мужчын зьбілі дырэктара гэтай кавярні, які заступіўся за дзьвюх дзяўчат. Nexta і «Наша Ніва» са спасылкамі на ўласныя крыніцы пішуць, што падазраваныя — супрацоўнікі Камітэту дзяржаўнай бясьпекі.

У КДБ Свабодзе сказалі, што «на дадзены момант не камэнтуюць гэтую сытуацыю». У адміністрацыі кавярні паведамілі, што яны «ўсе далі падпіску аб неразгалошваньні матэрыялаў крымінальнай справы ў Сьледчым камітэце».

Як адбылася бойка

Гомельскае выданьне «Сильные новости» расказвала, што двое п’яных мужчын зайшлі ў кавярню каля 18 гадзіны. Яны зрабілі замову, «селі за стол да дзяўчат-падлеткаў і сталі да іх прыставаць». Дзяўчаты сабраліся сыходзіць, мужчыны пачалі зрываць зь іх курткі. Дырэктар кавярні ўмяшаўся ў канфлікт.

Мужчыны паклікалі дырэктара «паразмаўляць на вуліцу». Адзін пачаў зьбіваць яго, пакуль той ня страціў прытомнасьць. Дырэктара шпіталізавалі, дыягнаставалі чэрапна-мазгавую траўму. Сын пацярпелага казаў Tut.by, што пасьля бойкі нападнікі «вярнуліся ў кавярню, даелі піцу і сышлі».

Сьледчы камітэт апісвае здарэньне падобным чынам. Адносна здарэньня крымінальную распачалі справу за «хуліганства» — ч.1 арт. 339 КК РБ прадугледжвае пакараньне штрафам, грамадзкімі працамі, папраўчымі працамі на тэрмін да 2 гадоў, арышт, абмежаваньне волі да 2 гадоў або пазбаўленьне волі да 3 гадоў.

Затрыманы 43-гадовы беспрацоўны жыхар Менску, які сам прыйшоў з павіннай да праваахоўнікаў. Сьведкам праходзіць ягоны спадарожнік, 42-гадовы мянчук.

Што пішуць пра нападнікаў і КДБ

Як сьцьвярджае Telegram-канал Nexta, адзін з нападнікаў сам прыйшоў здавацца да праваахоўнікаў — гэта аказаўся «звольнены на днях супрацоўнік КДБ». Спачатку канал сьцьвярджаў, што гэта быў былы начальнік інфармацыйна-аналітычнага аддзелу цэнтральнага апарату КДБ Дзьмітры Пабяржын. Але пазьней канал заявіў, што той праходзіць як сьведка, і дадаў, што падазраваны — «начальнік аддзелу абароны канстытуцыйнага ладу».

Журналіст «Нашай Нівы» Арцём Гарбацэвіч са спасылкай на ўласныя крыніцы таксама піша, што Пабяржын не падазраваны, а сьведка, і «ў час усяго стаяў побач», а падазраваны — «начальнік аддзелу абароны канстытуцыйнага ладу».

Сам Пабяржын заявіў «Нашай Ніве» наступнае:

«Тое, што пішуць у інтэрнэце, што я падазраваны, гэта няпраўда. Я не падазраваны, я гэтага злачынства не ўчыняў», — сказаў ён і адмовіўся ад далейшых камэнтароў.

Што кажуць у кавярні

Ад кавярні «The Box 99» да Гомельскага абласнога ўпраўленьня КДБ — літаральна сто мэтраў. Установа папулярная сярод моладзі.

«Цяпер дырэктар у шпіталі, — расказвае супрацоўнік кавярні. — Яму 49 гадоў. У яго стабільна-цяжкі стан. Дыягнаставалі чэрапна-мазгавую траўму, пералом костак чэрапу і ацёк мозгу. Ён у прытомнасьці».

Падзеі суботняга вечару ў кавярні адмовіліся пераказваць:

«Мы ўсе падпісалі падпіску аб неразгалошваньні матэрыялаў крымінальнай справы, у Сьледчым камітэце. Адмовіцца мы не маглі. Відаць, гэта зьвязана: мы чыталі ў навінах, з тым, што зьбілі дырэктара супрацоўнікі КДБ».

Ды ў кавярні кажуць, што дырэктара зьбіў не Пабяржын:

«Спачатку ў навінах, ня памятаем, дзе, было правільнае прозьвішча, а потым няправільнае — Пабяржын. А гэта не Пабяржын».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG