У Ерусаліме 14 салдат атрымалі раненьні ў выніку наезду аўтамабіля. Адзін вайсковец знаходзіцца ў цяжкім стане. Паліцыя расьсьледуе здарэньне, як тэракт.
Паводле ізраільскіх СМІ, нападнік заўважыў групу вайскоўцаў і наўмысна накіраваў на іх аўтамабіль, пасьля чаго зьехаў. Удакладняецца, што ўсе пацярпелыя — салдаты тэрміновай службы, якіх прызвалі ў войска ўвосень мінулага году.
Аўтамабіль нападніка знайшлі ў палестынскім горадзе Бейт-Джалілі непадалёк ад Бэтлеему.
Раней у чацьвер, 6 лютага, СМІ паведамілі пра напад на ізраільскага памежніка ў Старым горадзе Ерусаліму. Нападніка застрэлілі.
У ноч на 6 лютага ў горадзе Джэнін у Палестынскай аўтаноміі ізраільскія вайскоўцы пры падтрымцы памежнай паліцыі паўторна зруйнавалі дом араба, прызнанага вінаватым у забойстве рабіна. У ходзе сутыкненьняў з мясцовымі жыхарамі ізраільцяне застрэлілі двух чалавек. Адным з загінулых быў супрацоўнік палестынскай паліцыі.
5 лютага ў Хеўроне ізраільскія салдаты застрэлілі 17-гадовага палестынца. Паводле вайскоўцаў, ён кідаў у іх бутэлькі з запальнай сумесьсю.
Сытуацыя на Блізкім Усходзе зноў абвастрылася пасьля таго, як прэзыдэнт ЗША Дональд Трамп прапанаваў свой плян мірнага ўрэгуляваньня канфлікту паміж Ізраілем і Палестынскай аўтаноміяй. Ён прадугледжвае стварэньне незалежнай палестынскай дзяржавы, аднак толькі на частцы тэрыторыі Заходняга берага Ярдану і ў Сэктары Газы. Ерусалім пры гэтым пазначаны ў дакумэнце непадзельнай сталіцай Ізраіля.
Трамп назваў свае прапановы «ўгодай стагодзьдзя». Ізраільскія ўлады яе падтрымалі, але кіраўнік Палестынскай аўтаноміі Махмуд Абас заявіў, што ніколі ня прыме гэтых ўмоваў.
