Прэзыдэнт ЗША Дональд Трамп 28 студзеня прадставіў мірны плян, распрацаваны яго адміністрацыяй з мэтай урэгуляваць канфлікт паміж Ізраілем і палестынцамі.
У Белым доме прайшла сумесная канфэрэнцыя прэзыдэнта Трампа і кіраўніка ізраільскага ўраду Біньяміна Нэтаньягу.
«Сёньня Ізраіль робіць вялікі крок на шляху да міру», — заявіў Трамп.
Паводле амэрыканскага прэзыдэнта, плян дае палестынцам «апошнюю магчымасьць» стварыць незалежную дзяржаву.
«Апошнюю – таму што такой адзінай каманды, якая ў нас ёсьць цяпер, больш ня будзе», – сказаў Трамп.
Трамп падкрэсьліў, што згодна з плянам Ерусалім застаецца непадзельнай сталіцай Ізраіля. Адначасова ён прапанаваў прызнаньне Ўсходняга Ерусаліму сталіцай Палестыны. Пры гэтым, адзначыў Трамп, плян патрабуе, каб палестынцы адмовіліся ад мэтадаў ўзброенай барацьбы і ад падтрымкі Хамасу.
«Я паслаў сёньня ліст кіраўніку Палестынскай аўтаноміі Махмуду Абасу. Я сказаў яму, што тэрыторыя, прызначаная для Палестынскай дзяржавы, будзе на працягу чатырох гадоў заставацца ў цяперашнім стане, і гэты час можна будзе выкарыстоўваць для падрыхтоўкі стваральных пераменаў на гэтых тэрыторыях», – сказаў Трамп. І дадаў:
«Прыйшоў час ісламскаму сьвету выправіць памылку, зробленую ў 1948 годзе, і прызнаць Ізраіль. Час для гэтага прыйшоў».
Прэм’ер-міністар Ізраілю Біньямін Нетаньягу падтрымаў прапанову Трампа і выказаў гатоўнасьць неадкладна пачаць мірныя перамовы з палестынцамі ў выпадку, калі тыя прызнаюць габрэйскую дзяржаву.
Нетаньягу таксама сказаў, што згодна з плянам Ізраіль неадкладна анэксуе Ярданскую даліну і ўсе габрэйскія паселішчы Юдэі і Самарыі.
Тысячы палестынцаў пратэставалі раней 28 студзеня супраць пляну Трампа. Ізраільскія вайскоўцы тым часам разьмясьцілі свае войскі на тэрыторыі акупаванага Заходняга берагу.
Палестынскі прэм’ер-міністар Мухамад Штае заявіў, што плян Трампа — ня больш чым спосаб «закрыць палестынскае пытаньне». Палестынскі бок адмаўляецца весьці дыялёг з адміністрацыяй Трампа, абвінавачваючы яе ў прадузятасьці.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў