Лінкі ўнівэрсальнага доступу

Памочнік Лукашэнкі наведаў беларускамоўную школу ў Амелянцы, якую сабраліся закрыць


Амелянецкая школа

Анатоль Маркевіч сустрэўся з настаўнікамі, агледзеў памяшканьні школы і паразмаўляў з дырэктарам.

Пра візыт памочніка Лукашэнкі, інспэктара па Берасьцейскай вобласьці ў Амелянецкую сярэднюю школу Свабодзе паведаміў яе настаўнік Павал Кендысь. Паводле яго, прыезд высокага начальніка быў нечаканы, загадзя настаўнікаў ніхто не папярэджваў. Анатоль Маркевіч прыехаў у Амелянецкую школу без прадстаўнікоў мясцовага начальства, у тым ліку без кіраўніка аддзелу адукацыі Камянецкага раёну Віктара Грыцука.

«Анатоль Маркевіч агулам прабыў у школе каля чатырох гадзін, — сказаў Свабодзе Павал Кендысь. — Ён размаўляў з дырэктарам, з настаўнікамі. Абышоў памяшканьні школы, тэрыторыю. Калі размаўляў з намі, то адразу сказаў, што гутарка будзе адбывацца па-беларуску. Паколькі гэта беларуская школа, то і размаўляць тут трэба на беларускай мове. Агулам у мяне склалася ўражаньне, што ён застаўся задаволены тым, што пабачыў у нас».

Мясцовыя ўлады анансавалі магчымае закрыцьцё Амелянецкай школы восеньню 2019 году. Кіраўнік аддзелу адукацыі Камянецкага раёну Віктар Грыцук пазьбягае сустрэч з журналістамі. Супраціўляцца закрыцьцю школы спрабуе мясцовы настаўнік Павал Кендысь, які з дапамогай сябра разьмясьціў у інтэрнэце адпаведную пэтыцыю, а таксама зьвярнуўся зь лістом да абласных уладаў і ў Адміністрацыю кіраўніка краіны. На дадзены момант пэтыцыю падпісалі каля 3000 чалавек.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG