Лінкі ўнівэрсальнага доступу

Золатавалютныя рэзэрвы Беларусі — $9,3 мільярда. На што Беларусь траціць гэтыя грошы


Ілюстрацыйнае фота

За 4 гады ЗВР Беларусі вырасьлі больш як у два разы. Што ўплывае на рост і чаму гэтыя сродкі пакуль ня трацяць?

У той час як Беларусь мае праблемы з закупам нафты, а ўзровень жыцьця большасьці беларусаў далёкі ад заходнеэўрапейскага, золатавалютныя рэзэрвы Беларусі растуць. 9,3 мільярда даляраў цяпер ёсьць у Беларусі «на чорны дзень». Глядзім, на што і калі трацілі гэтыя сродкі і на што іх можна патраціць.

ЗВР, або золатавалютныя рэзэрвы, — гэта эканамічная падушка бясьпекі краіны. Туды ўваходзяць грошы ў замежнай валюце, каштоўныя мэталы (золата), дзяржаўныя аблігацыі іншых краін, іншыя актывы.

Як трацяцца золатавалютныя рэзэрвы Беларусі

Як расходаваць ЗВР Беларусі, вырашаюць органы кіраваньня. Апошні раз сур’ёзныя траты з золатавалютных рэзэрваў Беларусі, па статыстыцы Мінфіну, былі на ўтрыманьне курсу рубля. За 2014 год беларускі рубель дэвальваваўся на 25%, і гэта нават без уліку камісіі ў 30% на куплю замежнай валюты — камісію тады ўводзілі, каб спыніць ажыятаж.

Агулам за 2014 год з ЗВР пайшло каля 1,5 мільярда даляраў, каб «забясьпечыць плаўнае падзеньне курсу нацыянальнай валюты».

Таксама ЗВР Беларусь траціць на пазыкі. І папаўняе за кошт пазык, кажа старшы аналітык «Альпары» Вадзім Іосуб.

Вадзім Іосуб
Вадзім Іосуб

«Апошнія гады ў нас на рынку продажы валюты перавышалі яе куплю, таму ЗВР на гэта ня траціліся. Асноўнае прызначэньне ЗВР — гэтыя грошы могуць траціцца на пагашэньне валютнага доўгу. Калі мы бяром новы крэдыт — грошы трапляюць у ЗВР, калі аддаём — сыходзяць».

ЗВР напаўняюцца за кошт:

  • крэдытаў;
  • апэрацый Нацбанку на валютным рынку;
  • зьмены цаны на золата, бо яно ёсьць у складзе ЗВР;
  • экспартных пошлін на нафтапрадукты.

Таксама, па зьвестках Мінфіну, грошы з ЗВР могуць траціцца на падтрыманьне інфляцыі на пэўным узроўні.

Калі ЗВР могуць патраціць на іншае

ЗВР — гэта падушка бясьпекі Беларусі на «чорны дзень». Калі раптам ня будзе паступленьня валюты ў краіну, а імпартаваць нешта трэба, то могуць патраціць рэзэрвы.

«Калі будзе нейкі крытычны імпарт, могуць скарыстаць ЗВР. Напрыклад, няма грошай, а трэба імпартаваць нейкія лекі ці энэрганосьбіты», — кажа Іосуб.

Гэты запас складаецца ня толькі з грошай і золата, але і зь дзяржаблігацый разьвітых краін, якія можна прадаць за адзін дзень.

З 2016 году ЗВР Беларусі вырасьлі з 4,1 мільярда даляраў да 9,3 мільярда. На сьнежань мінулага году зьнешні доўг Беларусі складаў 16,5 мільярда даляраў. ЗВР меншы амаль напалову.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG