Лінкі ўнівэрсальнага доступу

Зяленскі не прыняў адстаўку прэм'ер-міністра Ўкраіны


Прэзыдэнт Украіны Ўладзімір Зяленскі

Прэзыдэнт Украіны Ўладзімір Зяленскі ня стаў прымаць адстаўку прэм'ер-міністра Аляксея Ганчарука.

Кіраўнік Украіны заявіў, што вырашыў даць шанец на чале ўраду і яго калегам, калі яны «вырашаць некаторыя задачы, якія сёньня вельмі важныя і вельмі хвалююць грамадзтва». Пра гэта паведамляецца на сайце прэзыдэнта Украіны. Зяленскі дадаў, што цяпер ня той час, каб «расхістваць дзяржаву эканамічна і палітычна».

Раней сёньня Зяленскі запатрабаваў ад праваахоўных органаў за два тыдні выявіць усіх датычных да праслухоўкі і публікацыі запісу размоваў прэмʼер-міністра, міністраў і прадстаўнікоў Нацыянальнага банку Ўкраіны.

15 студзеня ва ўкраінскім інтэрнэце зьявіўся аўдыёзапіс, сапраўднасьць якога пакуль не пацьверджана. На ім некалькі чалавек абмяркоўваюць падрыхтоўку дакладу па эканамічнай палітыцы прэзыдэнта, а таксама прычыны і наступствы павышэньня курсу грыўні. Акрамя таго, у запісе, чалавек з голасам, падобным на прэмʼера, кажа пра сваю «некампэтэнтнасьць» у эканамічных пытаньнях. Паводле некаторых дадзеных, запіс мог быць зроблены 16 сьнежня, а ў нарадзе нібыта ўдзельнічалі, акрамя Ганчарука, намесьніца старшыні Нацбанку Кацярына Ражкова, намесьніца кіраўніка Офіса прэзыдэнта Юлія Кузьняцова ды іншыя.

Ганчарук па выніках гэтага скандалу 17 студзеня напісаў заяву аб адстаўцы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG