Міністар навакольнага асяродзьдзя Японіі Сіндзіро Коізумі паведаміў, што возьме адпачынак прынамсі на два тыдні, каб даглядаць свайго нованароджанага сына. Пра гэта паведамляе агенцтва Reuters.
Для Японіі такое рашэньне мужчыны — рэдкасьць. Нягледзячы на тое, што закон дазваляе і жанчынам, і мужчынам браць да году часткова аплачанага адпачынку па даглядзе за дзіцем, толькі 6 працэнтаў мужчын карыстаюцца такой магчымасьцю. Нават сярод іх большасьць бярэ менш за тыдзень адпачынку.
Міністар, сын харызматычнага былога прэм’ер-міністра Дзюніціро Коізумі, патлумачыў, што хацеў бы стаць прыкладам для іншых мужчынаў. Аднак некаторыя дэпутаты скрытыкавалі яго, заявіўшы, што яму варта аддаць прыярытэт дзяржаўным абавязкам.
Цяперашні прэм’ер-міністар Японіі Сіндзо Абэ спрабуе заахвоціць мужчын браць адпачынак па даглядзе за дзіцем, а таксама заклікае японскія кампаніі стварыць лепшы балянс паміж працай і асабістым жыцьцём, каб падняць занятасьць жанчын у эканоміцы.
