Дзяржаўная дума РФ ухваліла кандыдатуру Міхаіла Мішусьціна на пасаду прэмʼер-міністра. За яго кандыдатуру прагаласавалі 383 дэпутаты, 41 чалавек — устрымаліся. Неўзабаве ўказ пра прызначэньне яго прэмʼерам падпісаў і Ўладзімір Пуцін.
У сваім выступе да пачатку галасаваньня Мішусьцін паўтарыў тэзісы звароту Пуціна да Савету Фэдэрацыі напярэдадні, а менавіта аб неабходнасьці своечасова прадстаўляць выплаты семʼям, забясьпечыць дзяцей гарачым харчаваньнем у школах, стварэньні новых працоўных месцаў і неабходнасьці рэфармаваньня ўрада.
Мішусьцін паведаміў, што ўнясе зьмены ў склад кабінэта міністраў, але якія менавіта, не ўдакладніў. У ліку сваіх прыярытэтаў ён назваў лічбавую эканоміку і апору на нацыянальныя праекты. Пакуль Мішусьцін ня сфармаваў новы кабінэт, часова выконваць абавязкі міністраў будуць былыя чальцы ўрада Мядзьведзева. Сам Мядзьведзеў указам Пуціна прызначаны часовым выканаўцам абавязкаў прэмʼера.
Хто такі Міхаіл Мішусьцін
1. Міхаіл Мішусьцін з 2010 года займае пасаду кіраўніка Фэдэральнай падатковай службы Расеі. Ён таксама ўваходзіў у склад Рады пры прэзыдэнце РФ па разьвіцьці фінансавага рынку Расеі ў пэрыяд з 2011 па 2018 гады. У сакавіку 2004 года Мішусьцін быў прызначаны кіраўніком Фэдэральнага агенцтва кадастра абʼектаў нерухомасьці — „Роснедвижимость“.
З 2006 па 2008-ы ён займаў пасаду кіраўніка Фэдэральнага агенцтва па ўпрўленьні асаблівымі эканамічнымі зонамі.
Па матэрыялах СМІ і водгуках калегаў, Мішусьціна шануюць у асноўным за яго кіраўнічыя і арганізатарскія здольнасьці. У прыватнасьці, як пісала 16 студзеня «Медуза», Мішусьцін займаўся ўкараненьнем кампутарных сыстэм у постсавецкай бюракратыі, а на пасадзе кіраўніка ФПС дамогся рэкорднай зьбіральнасьці падаткаў.
2. Выданьне «Праект» знайшло ў Мішусьціна нерухомасьць на Рублёўскай шашы ў Маскве, якую ён схаваў — уладальнікам 600-мільённага асабняка, які раней быў запісаны на яго, зараз значыцца «Расейская фэдэрацыя».
3. Апазыцыянэр Аляксей Навальны і заснаваны ім Фонд барацьбы з карупцыяй заклікаў Мішусьціна «неадкладна» раскрыць падрабязнасьці таго, якім чынам яго жонка зарабіла сотні мільёнаў рублёў, якія былі пазначаны ў яе падатковых дэклярацыях.
За апошнія 9 гадоў Уладлена Мішусьціна зарабіла амаль 13 мільёнаў даляраў, вынікае з падатковых дэклярацыяў.
4. Новы прэм’ер актыўна гуляе ў хакей у Начной хакейнай лізе (аматарскай спартыўнай арганізацыі - РС). У 2019 году яму разам з камандай уручаны Кубак Гагарына — ўзнагарода пераможцам плэй-оф Кантынэнтальнай хакейнай лігі. Уваходзіць у склад назіральнага савета хакейнага клуба ЦСКА.
5. Новы прэмʼер-міністар Расіі зьяўляецца аўтарам музыкі для дзьвюх песень папулярнага расейскага выканаўцы Грыгорыя Лепса. Пра гэта паведамляе выданьне «Ведомости» са спасылкай крыніцы ў асяродзьдзі Мішусьціна.
Суаўтар песень Лепса, пісьменьнік і паэт Аляксандр Вулых пацьвердзіў, што новы прэмʼер-міністар напісаў музыку для песьні «Попел» і «Сапраўдная жанчына». Паводле яго слоў, музыка — гэта хобі Мішусьціна, якое ён не афішуе.
