У інтэрвію галоўнаму рэдактару радыёстанцыі «Эхо Москвы» кіраўнік Беларусі Аляксандар Лукашэнка расказаў пра посьпехі малодшага сына ў хіміі. Як даведаўся Tut.by, Мікалай Лукашэнка заняў першае месца на раённай алімпіядзе па хіміі і цяпер рыхтуецца да абласнога этапу.
Малодшы сын Аляксандра Лукашэнкі Мікалай вучыцца ў Астрашыцка-Гарадоцкай сярэдняй школе Менскага раёну. Раённы этап алімпіяды па хіміі для дзевяціклясьнікаў праходзіў 22-23 лістапада 2019 году на базе гэтай жа школы. У ёй бралі ўдзел 22 чалавекі. Яны выконвалі тэставыя заданьні, рашалі задачы і праводзілі хімічны экспэрымэнт.
У выніку Мікалай Лукашэнка заняў першае месца. Ён, а таксама яшчэ адзін вучань Астрашыцка-Гарадоцкай школы (з другім вынікам) будуць удзельнічаць у абласным этапе алімпіяды па хіміі сярод навучэнцаў 9-х клясаў, які пройдзе з 13 па 17 студзеня ў Менску. Абласны этап алімпіяды складаецца зь дзьвюх частак — тэарэтычнай і практычнай.
Падрыхтоўкай да алімпіяды яны займаюцца з настаўніцай хіміі вышэйшай катэгорыі Галінай Макаравай. Гэтую інфармацыю Tut.by пацьвердзіла дырэктарка школы Натальля Бельмач.
Усяго ў гэтым навучальным годзе пяць вучняў школы будуць прадстаўляць Менскі раён на абласных алімпіядах — тры па хіміі і два па біялёгіі.
Рэспубліканскія прадметныя алімпіяды праводзяцца ў 9-11-х клясах і праходзяць у чатыры этапы — на школьным, раённым, абласным і рэспубліканскім узроўнях. Перамога на рэспубліканскай алімпіядзе ў 11-м клясе эквівалентная 100 балаў на ЦТ альбо дае права без іспытаў паступаць на спэцыяльнасьць, зьвязаную з прадметам, па якім праходзіла алімпіяда. Перамога на завяршальным этапе алімпіяды ў 9-м клясе гарантуе школьніку ўдзел на «рэспубліцы» налета.
