Прэзыдэнт Польшчы Анджэй Дуда, хутчэй за ўсё, не паедзе на Ўсясьветны форум памяці ахвяраў Галакосту, які адбудзецца ў Ізраілі.
Адна з асноўных прычынаў адмовы Дуды ад паездкі ў тым, што галоўным госьцем мае быць прэзыдэнт Расеі Ўладзімір Пуцін.
Афіцыйнага рашэньня ў гэтым пытаньні пакуль няма, але польскаму боку не падабаецца роля, якую можа адыграць Уладзімір Пуцін падчас форуму памяці Галакосту. Пра гэта паведаміла «Газэта Выборча».
Прадстаўнік прэзыдэнта Польшчы Кшыштаф Шчэрскі заявіў, што паводле праграмы галоўным госьцем і выступоўцам будзе Уладзімір Пуцін. Гэта азначае, мяркуе Шчэрскі, што Пуцін будзе мець магчымасьць працягваць ілжывыя тэзісы пра Другую ўсясьветную вайну, для польскага боку непрымальныя.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў