Лінкі ўнівэрсальнага доступу

Ва Ўкраіне назвалі «беларуска-расейскую інтэграцыю» экспансіяй Масквы ў рэгіёне


Акцыя ў падтрымку сувэрэнітэту Беларусі, 7 сьнежня 2019 году, Кіеў.

Кіроўны камітэт Украінскай нацыянальнай плятформы Форуму грамадзянскай супольнасьці Ўсходняга партнэрства заклікае ўлады Ўкраіны і эўрапейскіх краін прызнаць несапраўднай дамову аб стварэньні саюзнай дзяржавы Беларусі і Расеі.

«Як прадстаўнікі грамадзянскай супольнасьці Ўкраіны, мы хочам выказаць падтрымку і салідарнасьць грамадзянскай супольнасьці Беларусі і ўсяму беларускам народу ў іх намаганьнях супрацьстаяць агрэсару і захаваць сувэрэнітэт Беларусі», — адзначаецца ў заяве.

Украінская нацыянальная плятформа разглядае дзеяньні Расеі як экспансію яе гібрыднай агрэсіі ў рэгіёне і як спробу пазбавіць сувэрэнітэту краіны Ўсходняга партнэрства і захаваць іх у сфэры свайго ўплыву.

«Ужо шосты год Украіна перажывае ваенную агрэсію і іншыя, гібрыдныя, мэтады ціску з боку Расейскай Фэдэрацыі, што зьяўляецца своеасаблівай платай за нашу незалежнасьць і эўрапейскі выбар. Разам з Малдовай і Грузіяй, нашымі блізкімі партнэрамі па Ўсходнім партнэрстве, якія таксама пацярпелі ад расейскай агрэсіі, Украіна разумее праблемы і спадзяецца, што Беларусь застанецца сувэрэннай, недатыкальнай і эканамічна ўстойлівай»,— адзначаецца ў заяве прадстаўнікоў грамадзянскай супольнасьці Ўкраіны.

Ва Ўкраіне таксама падтрымалі заклік беларускай грамадзкасьці неадкладна апублікаваць усе «інтэграцыйныя» дакумэнты альбо іх праекты, таемна прынятыя кіраўнікамі Расеі і Беларусі і іхнымі адміністрацыямі:

«У выпадку, калі незалежныя экспэртызы выявяць, што пункты пагадненьняў і пратаколаў паміж Крамлём і афіцыйным Менскам парушаюць міжнароднае права, сувэрэнітэт і Канстытуцыю Беларусі, мы будзем настойваць на непрызнаньні легітымнасьці „саюзнай інтэграцыі“, якая парушае незалежнасьць Беларусі. Мы будзем зьвяртацца да ўладаў Украіны, замежных дзяржаў, міжнародных органаў і арганізацый, каб яны прызналі юрыдычна несапраўднымі „саюзныя дакумэнты“ паміж Расейскай Фэдэрацыяй і Беларусьсю».

Адначасова кіроўны камітэт Украінскай нацыянальнай плятформы Форуму грамадзянскай супольнасьці Ўсходняга партнэрства зьвярнуў увагу эўрапейскіх інстытутаў, міжнародных і праваабарончых арганізацый на факты перасьледу і арыштаў актывістаў у Беларусі ды іншыя рэпрэсіі ў галіне правоў чалавека.

Форум грамадзянскай супольнасьці «Ўсходняга партнэрства» — плятформа ўзаемадзеяньня паміж арганізацыямі грамадзянскай супольнасьці «Ўсходняга партнэрства» і Эўразьвязу з мэтай спрыяць рэформам у краінах — усходніх партнэрах Эўразьвязу (Азэрбайджан, Армэнія, Беларусь, Грузія, Малдова і Ўкраіна).

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG