Як сёлета штрафавалі грамадзкіх актывістаў і журналістаў і на што б хапіла гэтых грошай.
86 тысяч беларускіх рублёў — столькі штрафаў ужо выпісалі грамадзкім актывістам і журналістам за 2019 год. Гэта вынікае са штомесячных справаздач праваабарончага цэнтру «Вясна».
18 сьнежня пачалі затрымліваць удзельнікаў акцыяў супраць інтэграцыі з Расеяй 7 і 8 сьнежня. Так што штрафаў можа стаць болей.
На што можна патраціць гэтыя грошы
Аднапакаёўка ў Менску. За 86 тысяч рублёў ці 43 тысячы даляраў у Менску можна купіць аднапакаёўку ў «хрушчоўцы», але на элітнае жытло не хопіць.
3 мільёны мяхоў бульбы хопіць на штрафы, якія заплацілі актывісты ў 2019 годзе.
За грошы, якія пайшлі на штрафы, можна было б набыць для сталічнай міліцыі цэлых 5 ужываных аўтазакаў (у 2017 годзе ужываны аўтазак прадавалі за 16,5 тысяч рублёў). Ці 3 навюткія Geely для кіраўнікоў райвыканкамаў.
22 вэнтылятары для КДБ па Віцебскай вобласьці можна было б набыць за кошт адных штрафаў. Сайт дзяржаўных закупаў інфармуе, што такіх вэнтылятараў для адміністрацыйнага будынку КДБ у Віцебску трэба 27.
На газэту адміністрацыі прэзыдэнта «СБ: Беларусь сегодня» можна было б падпісаць 1529 апазыцыянэраў за імі ж аплачаныя штрафы на паўгода.
Агулам за 2019 год плянавалі сабраць штрафаў на 100 мільёнаў рублёў. Атрымліваецца, што штрафы актывістам складаюць толькі 0,9% ад гэтай сумы.
Грошай за штрафы хапіла б, каб набыць 70 абсалютна чыстых кароў. А гэта ўжо фэрма ці нават дзьве.
Каго штрафавалі
Праваабаронцы паведамляюць, што шмат штрафаў сёлета выпісана актывістам, якія пратэстуюць супраць акумулятарнага заводу ў Берасьці. Найбольш дасталося блогеру Сяргею Пятрухіну, якому налічылі штрафаў на некалькі тысяч даляраў.
Штрафавалі таксама актывістаў, якія пратэстуюць супраць рэстарану «Поедем поедим» у Курапатах. Найбольш штрафавалі актывістаў Маладога фронту, Ніну Багінскую, Паўла Севярынца.
Таксама ў 2019 вынесьлі прысуд Марыне Золатавай у «справе БелТА». Золатавай разам з кампэнсацыяй прысудзілі штраф у 13650 рублёў.
За 2019 год неаднойчы штрафавалі і журналістаў тэлеканалу «Белсат» за працу на замежныя СМІ без акрэдытацыі. Агулам за час існаваньня каналу журналістаў «Белсату» аштрафавалі на 96 661 даляраў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў