380 журналістаў і іншых работнікаў СМІ знаходзяцца ў месцах пазбаўленьня волі з прычыны сваёй прафэсійнай дзейнасьці. Гэта на 12 адсоткаў больш, чым летась.
Пра гэта паведамляецца ў штогадовай справаздачы міжнароднай арганізацыі «Рэпартэры бязь межаў» пра сытуацыю са свабодай слова ў сьвеце, апублікаванай 17 сьнежня.
Больш за ўсё журналістаў, якія апынуліся за кратамі, у Кітаі (120 чалавек), затым ідуць Эгіпет (36) і Сырыя (32). Беларусі ў гэтай статыстыцы няма.
З пачатку году ў сьвеце быў забіты 51 журналіст, гэта ўдвая менш, чым годам раней. Самымі небясьпечнымі для журналістаў краінамі у 2019 годзе сталі Мэксыка, Сырыя, Аўганістан, Пакістан і Самалі, адзначаецца ў дакладзе.
Акрамя таго, 57 работнікаў СМІ былі выкрадзеныя, адзін з іх на ўсходзе Ўкраіны, астатнія ў Сырыі, Емэне і Іраку. Многія зь іх лічацца зьніклымі бязь вестак.
Арганізацыя «Рэпартэры бязь межаў» падкрэсьлівае, што ў справаздачы гаворыцца толькі пра тых, пра каго дакладна вядома, што яны пацярпелі або загінулі праз сваю прафэсійную дзейнасьць.
