Экс-прэм’ера Чэхаславацкай Сацыялістычнай Рэспублікі (ЧССР), былога генэральнага сакратара камуністычнай партыі і экс-кіраўніка МУС абвінавачваюць у злоўжываньні службовымі паўнамоцтвамі. Сьледзтва лічыць, што яны маглі прадухіліць некалькі сьмерцяў на мяжы ў 1976–1989 гадах.
Паліцыя Чэхіі завяла крымінальныя справы ў дачыненьні да былых высокапастаўленых функцыянэраў ЧССР. Экс-старшыня ўраду ЧССР Любамір Штроўґал, былы генэральны сакратар Камуністычнай партыі Чэхаславаччыны Мілаш Якеш і экс-кіраўнік МУС Чэхаславаччыны Ўраціслаў Вайнар абвінавачваюцца ў злоўжываньні службовымі паўнамоцтвамі, гаворыцца ў паведамленьні чэскага Бюро дакумэнтацыі і расьсьледаваньня злачынстваў камунізму, апублікаваным 26 лістапада.
Гаворка ідзе пра ўжываньне зброі на чэхаславацкіх межах у 1970–1980 гадах. З сакавіка 1976 па канец 1989 году 9 чалавек, якія спрабавалі перасекчы мяжу, застрэлілі памежнікі, яшчэ прынамсі 7 чалавек атрымалі раненьні. Як падкрэсьліваецца ў паведамленьні, фігуранты справаў ведалі, што адбываецца на мяжы, аднак не зрабілі нічога, каб перадухіліць трагічныя здарэньні.
У выпадку доказу іхнае віны Штроўґалу, Якешу і Вайнару пагражае ад 2 да 10 гадоў пазбаўленьня волі.