«Апэляцыйны пратэст, які быў пададзены на прысуд Менскага гарадзкога суда, пракурорам адкліканы», — паведаміў Зьміцер Паліенка сайту palitviazni.info.
Паліенка распавёў, што 19 лістапада атрымаў ліст зь Менскага гарадзкога суда, у якім паведамляецца, што 11 лістапала дзяржаўны абвінаваўца — пракурор Аляксандар Кароль адклікаў апэляцыйны пратэст, пададзены 4 лістапада.
Паводле Паліенкі, такі паварот падзей для яго — нечаканасьць.
«Не разумею аднаго: калі пракурор зараз адклікаў пратэст, то навошта ён яго ўвогуле падаваў?» — зьдзіўляецца актывіст.
Раней Зьміцер Паліенка таксама абскардзіў вынесены яму прысуд. Актывіст настойвае, што цалкам не вінаваты, і патрабуе апраўданьня.
25 кастрычніка Менскі гарадзкі суд прызнаў Зьмітра Паліенку вінаватым у асабліва злосным хуліганстве, але вызваліў яго з-пад варты, прызначыўшы пакараньне ў выглядзе 3 гадоў «хатняй хіміі» (абмежаваньне волі без накіраваньня ў папраўчую ўстанову). Мінус год Зьмітру скасавалі па амністыі, але прызначылі яму прымусовае лячэньне ад алькагалізму.
11 лістапада Генэральная пракуратура Беларусі накіравала ў Вярхоўны суд апэляцыйны пратэст на прысуд Паліенку. У апэляцыйным пратэсьце пракурор Аляксандар Кароль зноў папрасіў для Паліенкі 5 гадоў строгага рэжыму (6 гадоў мінус год па амністыі). Паводле пракурора, Менгарсуд не ўстанавіў акалічнасьцяў, якія б зьмякчалі віну абвінавачанага Зьмітра Паліенкі, і прысуд яму «не адпавядае цяжкасьці злачынства і асобе абвінавачанага з прычыны мяккасьці».
Калі Зьміцер Паліенка выйшаў на волю, правёўшы больш як паўгода ў сьледчым ізалятары, ён гэтак камэнтаваў рашэньне суду:
«Працэс быў цыркам, рабілася ўсё, каб мяне пасадзіць надоўга, але тут прыпалі выбары. А Лукашэнку не патрэбен палітвязень, ён фліртуе з Захадам, праводзіць тут форумы па бясьпецы, таму вырашылі не рабіць зь мяне палітвязьня, ня больш за тое», — сказаў Зьміцер Паліенка.
Паводле Зьмітра Паліенкі, яму дагэтуль не вярнулі пашпарт, які міліцыя адабрала ў яго падчас арышту ў сакавіку 2019 году.
Што важна ведаць пра справу Паліенкі
Зьмітра Паліенку затрымалі 20 сакавіка за тое, што ён распыліў газавы балёнчык у твар мужчыну, які нібыта зрабіў яму заўвагу за курэньне на лесьвічнай пляцоўцы (сам Паліенка казаў, што скарыстаў балёнчык у мэтах самаабароны — толькі тады, калі на яго напаў п'яны мужчына).
Пазьней сьледчыя прадʼявілі яму яшчэ некалькі крымінальных абвінавачаньняў:
- «Псаваньне маёмасьці ў грамадзкім месцы» — за графіці на Ахоцкай вуліцы ў Менску (арт. 341).
- «Публічная абраза прадстаўніка ўлады ў сувязі з выкананьнем ім службовых абавязкаў» — за словы на адрас былога міністра ўнутраных спраў Ігара Шуневіча (арт. 369).
- «Асабліва злоснае хуліганства» — за графіці «Міліцыянты забіваюць людзей» на будынку ў Заводзкім раёне Менску (ч. 3 арт. 339).
- «Распальваньне сацыяльнай варожасьці» (ч. 1 арт. 130).
