Дэпутатка Канапацкая зьбірае подпісы, каб Палата прадстаўнікоў разгледзела яе законапраект

Дэпутатка Палаты прадстаўнікоў Ганна Канапацкая сьцьвярджае, што парлямэнт можа не разгледзець законапраект аб зьменах у Выбарчы кодэкс.

Што за законапраект?

У восеньскую сэсію Палата прадстаўнікоў мусіць разгледзіць законапраект пра зьмены ў Выбарчы кодэкс, які падрыхтавала Ганна Канапацкая.

Дэпутатка Канапацкая прапануе:

1. Публічнасьць падліку галасоў, калі старшыня камісіі паказвае бюлетэні ўсім і раскладае іх пад таблічкамі з прозьвішчамі прэтэндэнтаў;
2. Каб кожны кандыдат меў права ўключаць сваіх прадстаўнікоў у выбарчыя камісіі ўсіх узроўняў;
3. Пакінуць датэрміновае галасаваньне, але ягоныя ўдзельнікі мусяць патлумачыць, чаму яны галасуюць датэрмінова. У кожнай акрузе для гэтага вылучаць толькі адзін спэцыяльны ўчастак.

Што ў пэтыцыі?

Канапацкая прапануе падпісаць праз Google-форму пэтыцыю, каб Палата прадстаўнікоў разгледзела законапраект. Канапацкая лічыць, што разгляд законапраекту здымуць з парадку дня, бо камісія і адказны дэпутат не праводзяць неабходныя працэдуры. У пляне падрыхтоўцы законапраектаў на 2019 год, прапановаў па зьмене Выбарчага кодэксу няма.

У пад пэтыцыяй падпісанты патрабуюць:

• Забясьпечыць назіральнікам бесьперашкодны доступ да ўсіх этапаў выбарчага працэсу, уключаючы працу камісій, зьверку подпісаў і іншых дакумэнтаў кандыдатаў, праверку сьпісаў выбаршчыкаў і пратаколаў галасаваньня, бесьперашкоднага вядзеньня фота і відэаздымкаў на працягу ўсяго працэсу галасаваньня;
• Забясьпечыць празрысты падлік галасоў з абʼявай зьместу кожнага бюлетэня пры ўсіх прысутных на ўчастку так, каб усе члены камісіі і ўсе назіральнікі маглі бачыць вынік галасаваньня;
• Даць магчымасьць уключэньня ў склад усіх участковых і акруговых выбарчых камісій прадстаўнікоў ад кожнага з кандыдатаў;
• Перагледзець існуючае заканадаўства, каб «забясьпечыць роўныя правы для кандыдатаў, сапраўдную канкурэнцыю, свабоднае волевыяўленьне выбаршчыкаў і цэласнасьць выбарчага працэсу».

Усяго Канапацкая хоча сабраць 50 тысяч подпісаў.