Старшыня Эўрапейскай рады Дональд Туск назваў Расею «стратэгічнай праблемай Эўропы». Пра гэта Туск, які пакідае сваю пасаду ў сьнежні 2019 году, заявіў выступаючы перад студэнтамі Эўрапейскага каледжа ў бэльгійскім горадзе Бруге, піша расейская служба Свабоды са спасылкай на Financial Times.
Дональд Туск раскрытыкаваў прэзыдэнта Францыі Эманюэля Макрона, які ў нядаўнім інтэрвію часопісу The Economist заявіў пра неабходнасьць аднаўленьня стратэгічнага дыялёгу з Масквой.
«Прэзыдэнт Францыі нядаўна заявіў, што згодны ў гэтым пытаньні з прэм’ер-міністрам Вугоршчыны Віктарам Орбанам і разьлічвае, што апошні пераканае палякаў зьмяніць сваё стаўленьне да Расеі», — нагадаў Туск і дадаў: «Але не мяне, Эманюэль».
Паводле Туска, яму даводзілася публічна нагадваць людзям вакол амаль штотыдзень, што Расея зьяўляецца ня стратэгічным партнэрам Эўразьвязу, а яго стратэгічнай праблемай. За гэта многія называлі яго «фанатыкам адной ідэі», адзначыў Туск.
«Стратэгічнай мэтай Пуціна было ня толькі вярнуць кантроль над тэрыторыямі былога Савецкага Саюзу, але і сыстэматычна аслабляць Эўразьвяз, правакуючы ўнутраныя рознагалосьсі», — лічыць Туск.
Зь меркаваньнем прэзыдэнта Францыі раней не пагадзіліся канцлер Нямеччыны Ангела Мэркель і генэральны сакратар NATO Енс Столтэнбэрг.
У інтэрвію Макрон заявіў, што Эўропа больш ня можа спадзявацца на абарону ЗША як саюзьніка па NATO. Паводле яго, Эўропа стаіць на краі бездані і павінна пачаць думаць пра сябе як пра самастойную геапалітычную дзяржаву.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў