Лінкі ўнівэрсальнага доступу

Затрыманага ў Польшчы лідэра УНА-УНСО перадалі на парукі ўкраінскаму консулу


Ігар Мазур

Затрыманага ў Польшчы ўкраінскага актывіста Ігара Мазура перадалі на парукі консулу Ўкраіны. Пра гэта ў фэйсбуку паведаміла упаўнаважаная Вярхоўнай рады ў пытаньнях правоў чалавека Людміла Дзянісава.

Паводле яе, суд у справе абраньня меры стрыманьня адмяняецца. Да заканчэньня разгляду пытаньня аб экстрадыцыі Мазура ў Расею ён будзе жыць у генэральным консульстве Ўкраіны.

Ігар Мазур — вэтэран вайны ў Данбасе і адзін зь лідэраў нацыяналістычнай арганізацыі УНА-УНСО. Ён быў затрыманы напярэдадні на запыт Расеі на памежным пераходзе паміж Украінай і Польшчай. Расейскія сьледчыя ўнесьлі актывіста ў базу дадзеных Інтэрполу паводле падазрэньня ва ўдзеле ў баявых дзеяньнях у Чачні ў 1990-х гадах на баку чачэнскіх сэпаратыстаў.

Паводле такога абвінавачаньня ў Расеі раней былі асуджаныя два грамадзяніны Ўкраіны — Мікалай Карпюк і Станіслаў Клых. Яны не прызналі віны. У верасьні сёлета яны былі абмененыя ў рамках абмену паміж Расеяй і Ўкраінай паводле формулы «35 на 35».

Віцэ-сьпікер Сэйму Польшчы Малгажата Гасеўска напісала ў фэйсбуку, што Мазур быў затрыманы «выключна з тэхнічных прычынаў для захаваньня стандартнай працэдуры разгляду ордэру Інтэрполу», і Польшча наўрад ці перадасьць яго Расеі. Яна таксама абвінаваціла Расею ў выкарыстаньні міжнародных інстытутаў для перасьледу сваіх апанэнтаў. У падобным духу выказаліся і прадстаўнікі МЗС Украіны, і кіраўнік МУС краіны Арсен Авакаў. Міністар замежных справаў Польшчы Яцэк Чапутовіч заявіў, што пытаньне будзе вырашанае «ў адпаведнасьці зь міжнародным правам».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG