Чалец навуковай рады Расейскага ваенна-гістарычнага таварыства, дацэнт Інстытута гісторыі Санкт-Пецярбурскага дзяржаўнага ўнівэрсытэта, гісторык Алег Сакалоў затрыманы ў гарадзкой Марыінскай бальніцы па падазрэньні ва ўчыненьні забойства, паведамляе ТАСС са спасылкай на Сьледчы камітэт Расеі.
Сакалоў быў вылаўлены з ракі Мойка каля пяці раніцы непадалёк ад свайго дома. Ён спрабаваў утапіць заплечнік, у якім знаходзіліся фрагмэнты расчлянёнага цела, але ня змог, і скокнуў у ваду.
У яго кватэры знойдзена цела расчлянёнай 24 гадовай жанчыны. Забітая — былая студэнтка Сакалова, зь якой, як мяркуюць, яго зьвязвалі прафэсійныя і рамантычныя адносіны.
63-гадовы Сакалоў — адзін з заснавальнікаў руху гістарычнай рэканструкцыі ў Расеі. У 1976 годзе ён заснаваў першую ў Савецкім Саюзе групу ваенна-гістарычнай рэканструкцыі. Цяпер ён узначальвае агульнарасейскі Ваенна-гістарычны рух, які праводзіць рэканструкцыі ваенных бітваў пэрыяду напалеонаўскіх войнаў. Ён — кавалер францускага ордэна Ганаровага легіёна.
У 2008 годзе іншая студэнтка выкладчыка скардзілася на яго ў паліцыю, абвінаваціўшы яго ў хатнім гвалце.
