Прэзыдэнт ЗША Дональд Трамп разглядае магчымасьць удзелу ва ўрачыстых мерапрыемствах, прысьвечаных Дню перамогі ў Расеі 9 траўня наступнага году.
Пра гэта Трамп заявіў журналістам у Вашынгтоне перад адлётам у Атланту. Раней запрашэньне Трампу на ўрачыстасьці ў Маскве накіраваў прэзыдэнт Расеі Ўладзімер Пуцін.
У размове з журналістамі прэзыдэнт ЗША адзначыў, што высока цэніць запрашэньне. Пры гэтым Трамп падкрэсьліў, што імпрэзы ў Расеі будуць праходзіць у разгар палітычнага сэзону ў ЗША. «Я пагляджу, ці змагу я гэта зрабіць, але я б з радасьцю паехаў, калі б змог», — сказаў Трамп.
Агенцтва Reuters нагадвае, што адносіны Масквы і Вашынгтону абвастрыліся пасьля таго, як у ЗША было ўстаноўлена ўмяшаньне Расеі ў амэрыканскія прэзыдэнцкія выбары 2016 году. Аднак, на думку журналістаў, адказ Трампа дазваляе меркаваць аб тым, што лідэры дзьвюх краін маглі захаваць добрыя адносіны.
Пра тое, што Пуцін запрасіў Трампа на Парад Перамогі 9 траўня 2020 году, стала вядома ў чэрвені, пасьля сустрэчы лідэраў дзьвюх краін у Осацы на палях саміту «Вялікай дваццаткі».
Улетку памочнік прэзыдэнта Расеі Юрый Ушакоў распавёў, што запрашэньні на расейскія ўрачыстасьці з нагоды 75-годзьдзя Перамогі накіраваныя сярод іншых прэм’ер-міністру Вялікабрытаніі, канцлеру Нямеччыны, лідэру КНДР, прэзыдэнту Украіны. Аб пацьвярджэньні візытаў лідэраў гэтых краін пакуль не паведамлялася.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў