Лінкі ўнівэрсальнага доступу

30 беларускіх ахвяраў польскіх падпольшчыкаў прызналі пакутнікамі Царквы


Беларусы ў Варшаве пратэстуюць супраць граізацыі Рамуальда Райса "Бурага"

Усе беларускія праваслаўныя фурманы, забітыя ў 1946 годзе на Беласточчыне атрадам Рамуальда Райса «Бурага», па імёнах далучаныя да групы пакутнікаў Хэлмскіх і Падляскіх земляў. Так вырашылі біскупы Польскай праваслаўнай царквы.

Іх ушанаваньне прызначанае на дзень Іконы Заляшанскай Божай Маці, то бок у апошнюю суботу ліпеня. 31 студзеня 1946 «выклятыя жаўнеры» з аддзелу «Бурага» забілі 30 праваслаўных фурманаў з 12 вёсак на Гайнаўшчыне — Краснае Сяло, Збуч, Чыжы, Вялікія Пасечнікі, Ягаднікі, Лозіцы, Махнатае, Залешаны, Ракавічы, Крывая, Арэшкава, Выганоўская Волька — якія, на загад улады, паехалі ў пушчу на нарыхтоўку дроваў для школы.

Фурманоў, якія ўмелі перажагнацца па-каталіцку і згаварыць пацер па-польску, «Буры» адпусьціў дадому. А праваслаўных ягоныя жаўнеры, паводле некаторых сьведчаньняў, забівалі сякерамі, бо шкадавалі патронаў. Рамуальда Райса камуністы злавілі ў 1948 годзе, судзілі ў Беластоку і павесілі пад канец 1949 году. У судзе «Буры» сваёй віны не прызнаў, звальваючы адказнасьць за спаленыя вёскі і забітых беларускіх сялянаў на свайго намесьніка.

Хэлмскія і падляскія пакутнікі — гэта быў зборны тэрмін для праваслаўных сьвятых пакутнікаў, кананізаваных 7 і 8 чэрвеня 2003 года Польскай Аўтакефальнай Праваслаўнай Царквой. Усе яны загінулі падчас Другой сусьветнай вайны. Большасьць зь іх былі забітыя польскімі партызанскімі атрадамі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG